Qazaqstannyń eks-prezidenti Nursultan Nazarbaev qazirgi tańda saiasatqa aralasyp jatqan joq. Bul týraly Senat tóraǵasy Máýlen Áshimbaev málimdedi, dep habarlaidy "Ult aqparat".
«Qazaqstannyń Tuńǵysh Prezidenti Nursultan Nazarbaev dál qazir saiasatqa aralasa ma? Qandai da bir sheshim qabyldaýǵa yqpal ete me? Ol kisimen aqyldasasyz ba?» - dep surady tilshilerdiń biri Senat otyrysynan keiin.
«Qazir Nursultan Nazarbaev saiasatqa aralasyp jatqan joq. Ony ózderińiz de kórip otyrsyzdar. Árine, úlken jaǵdailar bolǵanda, referendým siiaqty sharalar ótken kezde el azamaty retinde, saiasatker retinde mindetti túrde qatysady...
Barlyq másele zańda kórsetilgendei sheshilip jatyr. Konstitýtsiiaǵa sáikes Prezident quqyqtary bar. Qasym-Jomart Kemeluly sol quqyqtardyń bárin júzege asyrýda. Sondai-aq Úkimettiń, Senattyń, Májilistiń quqyqtary bar. Olardyń bárin zań júzinde júzege asyryp jatyrmyz.
Nursultan Ábishuly referendým bolǵan kezde Qazaqstan azamaty retinde óz daýysyn berdi. Ol – árbir azamattyń quqyǵy. Biraq saiasatker retinde, Tuńǵysh Prezident retinde Qazaqstan saiasatyna aralasyp otyrǵan joq», - dedi Áshimbaev jýrnalist saýalyna jaýap berip.
Osy tusta tilshi taǵy da «iaǵni sizder ol kisimen aqyldasatyndaryńyzdy moiyndaisyz ǵoi?» degen suraq qoidy. Al Senat tóraǵasy olai aitpaǵanyn eskertti.
«Ol kisimen aqyldaspaimyz. Ol kisimen ondai eshqandai shara joq. Men óitip aitqan joqpyn. Jalpy qazirgi kezde biliktiń barlyq tarmaǵy, memlekettik organdar zańda kórsetilgen quzyretterdiń bárin ózderi zań júzinde júzege asyryp jatyr», - dep túiindedi Áshimbaev.
