QR Prezidenti Nursultan Nazarbaev Aqordada kópbalaly analarǵa «Altyn alqa» men «Kúmis alqa» tósbelgilerin saltanatty túrde tapsyrdy, dep xabarlaidy QazAqparat.
Memleket basshysynyń qolynan eki ana tósbelgi aldy. Bireýi - Altynai Sársenbaeva. Ol - Atyraý oblysynyń týmasy. 2000 jyly Qurmanǵazy aýdanynyń Baida aýyldyq mektebin bitirgen. Búginde Hálel Dosmuxamedov atyndaǵy ýniversitettiń filologiia fakýltetinde 4 kýrsta oqidy. Jasy - 36-da. 2004 jyly turmysqa shyǵyp, búginde jeti balanyń anasy atanyp otyr. Jeke biznesi bar. Joldasy ekeýi úi salyp, qazir sol jerde otbasymen birge turady. Altynaiǵa «Altyn alqa» tósbelgisi tabystaldy.
Al Mánshúk Mámbetovaǵa Prezident «Kúmis alqany» taqty. M.Mámbetova Ál-Farabi atyndaǵy Qazaq ulttyq ýniversitetinde jumys isteidi. Dotsent ataǵy bar. Joldasy ekeýi alty balany tárbielep otyr.
Aita keteiik, búgin QR Prezidenti Nursultan Nazarbaev Aqordada bir top áielder qaýymymen kezdesti. Sol jerde Memleket basshysy barsha analar men qyz-kelinshekterdi 8 Naýryz - Halyqaralyq áielder kúnimen quttyqtady.
«Ananyń qudireti sheksiz. «Onyń aldynda búkil dúnie bas iedi» dep tegin aitylmasa kerek. Erte zamanda jaýlasqan jurttyń ortasyna ana aq jaýlyǵyn tastaǵan kezde soǵys toqtalyp, bitimge keletin bolǵanyn bilemiz. Dástúrimizdi barynsha saqtap kele jatqan biz áiel zatyn ásirese qadirleitin xalyqpyz. Qazaq ulty qyz balany ár ýaqytta alaqanyna salyp, aialap otyratyn. Bul saltymyz otbasy úshin buzylmas zańdylyqqa ainalyp keledi. «Ana» degen qasterli sózdi estigende tebirenbeitin júrek joq, tolqymaityn kóńil bolmaidy», - deidi N.Nazarbaev.
Memleket basshysy kópbalaly otbasylarǵa kómek berý máselesin qozǵady.
.jpeg)