Nursultan Nazarbaev Efiopiia Federativtik Demokratiialyq Respýblikasynyń Prezidenti Sahle-Vork Zeýdege kóńil aitý jedelhatyn joldady, dep habarlaidy Aqorda.
Memleket basshysy ushaq apaty saldarynan kóptegen adamnyń qaza bolǵany týraly habardy zor kúizelispen qabyldady.
«Osy qaraly sátte Qazaqstan halqynyń jáne jeke ózimniń atymnan qaiǵyǵa ortaqtasyp, qaza bolǵandardyń týǵan-týystary men jaqyndaryna, sondai-aq barsha Efiopiia halqyna kóńil aitamyn», - delingen jedelhatta.
Eske sala keteiik, Efiopiiada Ethiopian Airlines áýe kompaniiasynyń Nairobige bara jatqan ushaǵy apatqa ushyraǵandyǵy týraly buǵan deiin habarlaǵan bolatynbyz. Boeing 737 laineri Nairobige bara jatqanda Oromiia óńirinde, Debre-Zeit eldi mekeniniń mańynda apatqa ushyraǵan. Ushaq bortynda 149 jolaýshy jáne segiz ekipaj múshesi bolǵan.
