Nursultan Nazarbaev Resei Federatsiiasynyń Qazaqstan Respýblikasyndaǵy Tótenshe jáne Ókiletti Elshisi Mihail Bocharnikovpen kezdesti, dep habarlaidy "Ult aqparat" Aqordaǵa silteme jasap.
Memleket basshysy Qazaqstandaǵy diplomatiialyq missiiasynyń aiaqtalýyna bailanysty Resei Federatsiiasynyń elshisi M.Bocharnikovpen kezdesti.
Nursultan Nazarbaev M.Bocharnikovtyń Qazaqstan men Resei arasyndaǵy qarym-qatynasty nyǵaitýǵa qosqan úlesin erekshe atap ótip, onyń Qazaqstandaǵy diplomatiialyq qyzmetine rizashylyq bildirdi.
– Siz Reseidiń Qazaqstandaǵy elshisi retinde 11 jyl qyzmet atqardyńyz. Bul jyldar ishinde Qazaqstan men Resei arasyndaǵy qarym-qatynas nyǵaidy. Biz diplomatiialyq bailanystarymyzdyń 25 jyldyǵyn atap óttik. Óńiraralyq yntymaqtastyǵymyz damyp, joǵary deńgeidegi saparlar men kezdesýlerimiz jiilei tústi. Bizdiń seriktestigimiz – memleketaralyq qarym-qatynastyń jarqyn mysaly, – dedi Qazaqstan Prezidenti.
Memleket basshysy eki eldiń halyqaralyq arenada tabysty yqpaldastyq ornatqanyn aitty.
– Biz halyqaralyq deńgeide bir-birimizdi qoldaimyz. AQSh-qa saparym kezinde Resei men Amerika arasyndaǵy qarym-qatynas máselesine zor mán berdim, – dedi Nursultan Nazarbaev.
Mihail Bocharnikov eki el arasyndaǵy qarym-qatynastardyń joǵary deńgeide damyp kele jatqanyn aityp, Qazaqstannyń jahandyq qaýipsizdikti nyǵaitý isindegi belsendi qyzmetine toqtaldy.
– Qazaqstanda 11 jyldan astam atqarǵan qyzmetim barysynda elderińizge degen rizashylyq sezimim arta tústi. Qazaqstannyń BUU Qaýipsizdik Keńesine múshe bolýy jáne bul organǵa tóraǵalyq etýi halyqaralyq beibitshilik pen qaýipsizdikti qamtamasyz etý isindegi elderińizdiń mańyzdylyǵyn kórsetip otyr, – dedi Resei Federatsiiasynyń Qazaqstandaǵy elshisi.
Sonymen qatar M.Bocharnikov eki eldiń Eýraziialyq ekonomikalyq odaq aiasyndaǵy yntymaqtastyǵynyń nátijeleri men aldaǵy perspektivalaryn atap ótti.
Kezdesý sońynda Nursultan Nazarbaev M.Bocharnikovty «Dostyq» ordenimen marapattady.
