Memleket basshysy Qaraǵandy oblysynyń aktivimen óńirdiń áleýmettik-ekonomikalyq damý máseleleri jóninde keńes ótkizdi, - dep habarlaidy "Ult aqparat" Aqordaǵa silteme jasap.
Keńeste Elbasy oblystyq máslihattyń depýtattary kandidatýrasyn maquldaǵan óńirdiń jańa ákimi Erlan Qoshanovty tanystyrdy.
Nursultan Nazarbaev jiynǵa qatysýshylarǵa arnaǵan sózinde elimizdiń jáne Qaraǵandy oblysynyń ekonomikalyq jáne áleýmettik damý kórsetkishterine toqtalyp ótti.
– Táýelsizdik alǵannan beri bul óńirdiń ekonomikasy 23 ese ósti, indýstriialandyrýdyń 72 nysany iske qosyldy. Oblysqa sońǵy 5 jylda 1,7 trillion teńge investitsiia salyndy. Apatty jaǵdaidaǵy mektepter problemasy joiylyp, úsh aýysymmen bilim berý máselesi sheshilýde. Jol kartasy aiasynda 4 myńnan astam adam jumyspen qamtyldy, – dedi Memleket basshysy.
Qazaqstan Prezidenti eldegi saiasi reformalar úderisine erekshe nazar aýdaryp, prezidenttik vertikaldi saqtaýdyń aspektileriniń jáne memlekettik biliktiń barlyq tarmaǵynyń jaýapkershiligin arttyrýdyń mańyzdylyǵyn atap ótti.
Sondai-aq, Elbasy birqatar ózekti mindetterdi oryndaý qajettigin aityp, oblys turǵyndaryn eldiń ekonomikalyq jańǵyrýyna belsene atsalysýǵa shaqyrdy.
– Investitsiia tartý úshin qolaily jaǵdai týǵyzý kerek. Qazaqstan Dúniejúzilik bank reitinginiń «Biznes júrgizý jeńildigi» kriteriii boiynsha 35-oryndy ielenip otyr. Bul – jaqsy kórsetkish, alaida bizge eń áýeli óńirlerdegi jumysty jalǵastyrý qajet. Biz biznes júrgizý jeńildigi boiynsha oblystardyń arnaýly reitingin jasap, jyl saiyn indýstriialandyrý kúni tabys etiletin ataýly syilyq taǵaiyndaimyz, – dedi Nursultan Nazarbaev.
Sonymen birge, Memleket basshysy kásipkerlik aiasyn keńeitý, memleket-jekemenshik seriktestigin damytý, aýyl sharýashylyǵyn sýbsidiialaý, «Nurly jer» baǵdarlamasyn iske asyrý, óndiriletin ónimdegi qazaqstandyq úlesti arttyrý, sondai-aq ǵylymi-zertteý institýttaryn qatystyrý arqyly ónerkásip sektoryn innovatsiialyq turǵydan damytý sharalaryna nazar aýdardy.
– Biz básekege qabiletti eksporttyq kásiporyndarǵa negizdelgen indýstriialandyrýdy jalǵastyrýǵa tiispiz. Taýar jetkizý, qyzmet kórsetý jáne olardy tutyný jóninen jahandyq júieden ornymyzdy tabýymyz qajet. Bul maqsatqa transulttyq kompaniialardy tartý arqyly qol jetkize alamyz, – dedi Qazaqstan Prezidenti.
Nursultan Nazarbaev eldegi ákimder men damý institýttary basshylarynyń aldyna otandyq kásiporyndardy odan ári damytý úshin investorlarmen jumysty jandandyrý mindetin qoidy.
Kezdesý sońynda Qaraǵandy oblysynyń jańa ákimi Qazaqstan halqyna jáne Prezidentine ant berdi.
.jpeg)