Nazarbaev: Bilikti qoldan shyǵaryp alsaq, táýelsizdikten aiyrylamyz

Qazaqstannyń Tuńǵysh Prezidenti Nursultan Nazarbaev qazaqstandyqtardy birlikke shaqyrdy, dep habarlaidy Sputnik Qazaqstan tilshisi.

"Nur Otan partiiasynyń atynan prezident sailaýyna túsetin Qasym-Jomart Toqaevtyń kandidatýrasyn biraýyzdan qoldaǵandaryńyz úshin shynaiy rizashylyǵymdy bildiremin. Barshamyz jurt bolyp jumylyp, osy synaqtan taǵy da súrinbei ótemiz dep senemin", - dedi Nazarbaev Nur Otan partiiasynyń kezekten tys sezinde.

Elbasy Nur Otan kósh bastap kele jatqan eń iri saiasi uiym ekenin atap ótti. Onyń aitýynsha, partiianyń halyq pen bilik arasyndaǵy dánekerlik róli sailaý kezinde airyqsha ańǵarylady.

"Bizdiń maqsatymyz el turǵyndarynyń turmysyn jaqsartyp, Qazaqstandy odan ári órkendetý. Qoǵamda tatýlyq pen turaqtylyqty qamtamasyz etý – óte mańyzdy mindet. Barlyq eldermen salystyrǵanda, biz úlken de , kishi de memleket emespiz. Biraq ainalamyzda neshe túrli jaǵdai bolyp jatyr. Zaman zymyrap barady. Ǵylym men tehnika ósip-órkendeýde. Osyndai zamanda artta qalmaý úshin, basqa eldiń shańyn jutpaý úshin bizge birlik kerek. Elimizdiń memlekettiligin myqtap qolmen ustaý kerek", - dedi Elbasy.

"Bilikti qoldan shyǵaryp alsaq..."

Nazarbaevtyń aitýynsha, bes saýsaq birdei emes. Elbasy táýelsizdikti saqtap qalý úshin eń aldymen qazaqtyń birligi qajet ekenin atap ótti.

"Batystyń artynan júgirip, demokratiialy el bolamyz degender bar. Ony biz kórmei otyrǵan joqpyz. Biraq ta bizdiń jaǵdaiymyzda, eger de bilikti qoldan shyǵaryp alsaq, biz eldikten aiyrylamyz, táýelsizdikten de jurdai bolamyz", - dedi ol.

Nazarbaev aldaǵy prezident sailaýynda partiia atynan dodaǵa túsetin kandidatqa qoldaý kórsetýge shaqyrdy. Ol muny árbir sailaýshy túsinýi tiis ekenin aitty.

"Eń keregi – qazaqtyń birligi, kópultty halqymyzdyń birligi", - dedi ol.