قازاقستاننىڭ تۇڭعىش پرەزيدەنتٸ نۇرسۇلتان نازارباەۆ قازاقستاندىقتاردى بٸرلٸككە شاقىردى, دەپ حابارلايدى Sputnik قازاقستان تٸلشٸسٸ.
"Nur Otan پارتيياسىنىڭ اتىنان پرەزيدەنت سايلاۋىنا تٷسەتٸن قاسىم-جومارت توقاەۆتىڭ كانديداتۋراسىن بٸراۋىزدان قولداعاندارىڭىز ٷشٸن شىنايى ريزاشىلىعىمدى بٸلدٸرەمٸن. بارشامىز جۇرت بولىپ جۇمىلىپ, وسى سىناقتان تاعى دا سٷرٸنبەي ٶتەمٸز دەپ سەنەمٸن", - دەدٸ نازارباەۆ Nur Otan پارتيياسىنىڭ كەزەكتەن تىس سەزٸندە.
ەلباسى Nur Otan كٶش باستاپ كەلە جاتقان ەڭ ٸرٸ ساياسي ۇيىم ەكەنٸن اتاپ ٶتتٸ. ونىڭ ايتۋىنشا, پارتييانىڭ حالىق پەن بيلٸك اراسىنداعى دەنەكەرلٸك رٶلٸ سايلاۋ كەزٸندە ايرىقشا اڭعارىلادى.
"بٸزدٸڭ ماقساتىمىز ەل تۇرعىندارىنىڭ تۇرمىسىن جاقسارتىپ, قازاقستاندى ودان ەرٸ ٶركەندەتۋ. قوعامدا تاتۋلىق پەن تۇراقتىلىقتى قامتاماسىز ەتۋ – ٶتە ماڭىزدى مٸندەت. بارلىق ەلدەرمەن سالىستىرعاندا, بٸز ٷلكەن دە , كٸشٸ دە مەملەكەت ەمەسپٸز. بٸراق اينالامىزدا نەشە تٷرلٸ جاعداي بولىپ جاتىر. زامان زىمىراپ بارادى. عىلىم مەن تەحنيكا ٶسٸپ-ٶركەندەۋدە. وسىنداي زاماندا ارتتا قالماۋ ٷشٸن, باسقا ەلدٸڭ شاڭىن جۇتپاۋ ٷشٸن بٸزگە بٸرلٸك كەرەك. ەلٸمٸزدٸڭ مەملەكەتتٸلٸگٸن مىقتاپ قولمەن ۇستاۋ كەرەك", - دەدٸ ەلباسى.
"بيلٸكتٸ قولدان شىعارىپ الساق..."
نازارباەۆتىڭ ايتۋىنشا, بەس ساۋساق بٸردەي ەمەس. ەلباسى تەۋەلسٸزدٸكتٸ ساقتاپ قالۋ ٷشٸن ەڭ الدىمەن قازاقتىڭ بٸرلٸگٸ قاجەت ەكەنٸن اتاپ ٶتتٸ.
"باتىستىڭ ارتىنان جٷگٸرٸپ, دەموكراتييالى ەل بولامىز دەگەندەر بار. ونى بٸز كٶرمەي وتىرعان جوقپىز. بٸراق تا بٸزدٸڭ جاعدايىمىزدا, ەگەر دە بيلٸكتٸ قولدان شىعارىپ الساق, بٸز ەلدٸكتەن ايىرىلامىز, تەۋەلسٸزدٸكتەن دە جۇرداي بولامىز", - دەدٸ ول.
نازارباەۆ الداعى پرەزيدەنت سايلاۋىندا پارتييا اتىنان دوداعا تٷسەتٸن كانديداتقا قولداۋ كٶرسەتۋگە شاقىردى. ول مۇنى ەربٸر سايلاۋشى تٷسٸنۋٸ تيٸس ەكەنٸن ايتتى.
"ەڭ كەرەگٸ – قازاقتىڭ بٸرلٸگٸ, كٶپۇلتتى حالقىمىزدىڭ بٸرلٸگٸ", - دەدٸ ول.
.jpeg)