Qazaqstan Prezidenti Birikken Arab Ámirlikteriniń Vitse-Prezidenti, Premer-Ministri, Dýbai ámirliginiń bileýshisi, sheih Muhammed ben Rashid Ál Maktýmmen kezdesti, - dep habarlaidy "Ult aqparat" Aqordaǵa silteme jasap.
Kelissóz barysynda taraptar eki el arasyndaǵy yntymaqtastyqtyń qazirgi ahýaly men ony budan ári damytý jaiyn talqylady. Atap aitqanda, saýda-ekonomika, qarjy jáne investitsiia salalaryndaǵy ózara is-qimyl máseleleri qaraldy.
Memleket basshysy Dýbai halyqaralyq qarjy ortalyǵy (DIFC) men Dýbai qalasynyń qarqyndy damyp kele jatqanyn atap ótti.
Nursultan Nazarbaev qarjy ortalyǵyn tiimdi basqarý turǵysynan Birikken Arab Ámirlikterimen tájiribe almasýdyń mańyzdylyǵyna, sondai-aq DIFC pen Astana halyqaralyq qarjy ortalyǵy arasynda tyǵyz qarym-qatynas ornatý qajettigine toqtaldy. Dýbai ámirliginiń bileýshisi bul baǵytta is-qimyl ornatýǵa tolyq daiyn ekenin jetkizdi.
Qazaqstan Prezidenti islamdyq qarjylandyrý isin damytyp, ony engizýge airyqsha úles qosqany úshin sheihqa alǵys bildirdi.
Budan bólek, Memleket basshysy «EKSPO-2017» halyqaralyq mamandandyrylǵan kórmesine daiyndyqtyń aiaqtalǵanyn, keiinnen kórme nysandary Astana halyqaralyq qarjy ortalyǵynyń jumysy úshin paidalanylatynyn aitty.
Kezdesý sońynda Nursultan Nazarbaev Birikken Arab Ámirlikteriniń Premer-Ministrin Astanadaǵy «EKSPO-2017» kórmesiniń ashylýyna shaqyrdy.
