Búgin Astana qalasy ákimdiginiń ǵimaratynda Elbasy Nursultan Nazarbaevtyń tóraǵalymen elordany odan ary damytý máselelerine arnalǵan májilis ótip jatyr, dep habarlaidy QazAqparat.
«Minekei, kózdi ashyp-jumǵansha 20 jyl ótip ketti. Biz biyl Astananyń 20 jyldyq mereitoiyn atap ótemiz. Menimen birge sol kezde kelgen qatarlastarym, jastardyń esinde bolsa, bul jer ien dala bolatyn. Burynǵy Aqmola qalasynyń tóńireginiń qandai bolǵanyn bárimiz bilemiz. Jańa qalanyń ornynda midai dala, eshteńe joq. Qazir kele jatyp qalany kórgende osylai bolǵanyna ózim de tańǵalamyn. Biz ata-babamyzdyń armanyn oryndap, Saryarqanyń tórinde el ordasy - astanany salyp, dúniejúzin tamsandyryp, elimizdi qýantatyn, kórshilerimiz tańǵalatyn shaharǵa ainaldyrdyq», - dedi májilisti ashqan Qazaqstan Prezidenti.
Memleket basshysy osy rette kúndiz-túni, aiazda, boranda tynbai jumys istegen qurylysshylarǵa, montajshylarǵa, qalanyń ishi-syrtyn tazalaǵan jumysshylarǵa rizashylyǵyn bildirdi.
«Árine, onyń ishinde bizdiń de azdaǵan eńbegimiz bar. Sondyqtan osy 20 jyldyqty qalai ótkizemiz degen máselemen jinalyp otyrmyz. Jylda qalada istelgen sharýalardy osyndai keńeste aqylǵa salyp, ary qarai ne isteý kerektigin aqyldasamyz», - dedi Elbasy.
