بٷگٸن استانا قالاسى ەكٸمدٸگٸنٸڭ عيماراتىندا ەلباسى نۇرسۇلتان نازارباەۆتىڭ تٶراعالىمەن ەلوردانى ودان ارى دامىتۋ مەسەلەلەرٸنە ارنالعان مەجٸلٸس ٶتٸپ جاتىر, دەپ حابارلايدى قازاقپارات.
«مٸنەكەي, كٶزدٸ اشىپ-جۇمعانشا 20 جىل ٶتٸپ كەتتٸ. بٸز بيىل استانانىڭ 20 جىلدىق مەرەيتويىن اتاپ ٶتەمٸز. مەنٸمەن بٸرگە سول كەزدە كەلگەن قاتارلاستارىم, جاستاردىڭ ەسٸندە بولسا, بۇل جەر يەن دالا بولاتىن. بۇرىنعى اقمولا قالاسىنىڭ تٶڭٸرەگٸنٸڭ قانداي بولعانىن بەرٸمٸز بٸلەمٸز. جاڭا قالانىڭ ورنىندا ميداي دالا, ەشتەڭە جوق. قازٸر كەلە جاتىپ قالانى كٶرگەندە وسىلاي بولعانىنا ٶزٸم دە تاڭعالامىن. بٸز اتا-بابامىزدىڭ ارمانىن ورىنداپ, سارىارقانىڭ تٶرٸندە ەل ورداسى - استانانى سالىپ, دٷنيەجٷزٸن تامساندىرىپ, ەلٸمٸزدٸ قۋانتاتىن, كٶرشٸلەرٸمٸز تاڭعالاتىن شاھارعا اينالدىردىق», - دەدٸ مەجٸلٸستٸ اشقان قازاقستان پرەزيدەنتٸ.
مەملەكەت باسشىسى وسى رەتتە كٷندٸز-تٷنٸ, ايازدا, بوراندا تىنباي جۇمىس ٸستەگەن قۇرىلىسشىلارعا, مونتاجشىلارعا, قالانىڭ ٸشٸ-سىرتىن تازالاعان جۇمىسشىلارعا ريزاشىلىعىن بٸلدٸردٸ.
«ەرينە, ونىڭ ٸشٸندە بٸزدٸڭ دە ازداعان ەڭبەگٸمٸز بار. سوندىقتان وسى 20 جىلدىقتى قالاي ٶتكٸزەمٸز دەگەن مەسەلەمەن جينالىپ وتىرمىز. جىلدا قالادا ٸستەلگەن شارۋالاردى وسىنداي كەڭەستە اقىلعا سالىپ, ارى قاراي نە ٸستەۋ كەرەكتٸگٸن اقىلداسامىز», - دەدٸ ەلباسى.
