Qazaqstannyń Tuńǵysh Prezidenti Nursultan Nazarbaev óziniń qurmetine elorda ataýynyń ózgertilýine qatysty pikir bildirdi, dep habarlaidy Sputnik agenttigi.
6 shildede Qazaqstanda "Qazaq: history of the golden man" derekti filminiń premerasy ótti, suhbatty "Oskar" syilyǵyn alǵan rejisser Oliver Stoýn júrgizip, filmge ózi prodiýserlik jasady.
Nazarbaev Qazaqstan astanasynda bolǵan ózgeristerdi tanystyra otyryp, birneshe jyl buryn bul jer dala bolǵanyn aitty.
"Qazir qala tur", - dedi Nazarbaev Stoýnǵa.
"Iá, sizdiń qalańyz. Ony Nur-Sultan dep ataǵan siz be?", - dep surady Stoýn.
"Men muny qalamadym. Daýlastym, qalaǵan joqpyn", - dep málimdedi Elbasy.
"Al siz qalaǵa qandai ataý bergińiz keldi?"- dep surady tanymal rejisser.
"Astana boldy, men solai atadym. Astanany qazaqshadan orysshaǵa aýdarǵanda "stolitsa" bolady. Biraq Prezident (Qasym-Jomart Toqaev – red.) qalaǵa ony qurýshynyń esimi berilýi kerek dep sheshti", - dedi Nazarbaev.
Eske sala keteiik, Qazaqstan prezidenti Qasym-Jomart Toqaev 2019 jyldyń 20 naýryzynda ulyqtaý rásiminde sóilegen sózinde eldiń astanasyn "osy qalany salǵan adamnyń" qurmetine ataýdy usynǵan bolatyn. 23 naýryzda Astana resmi túrde Nur-Sultan bolyp ózgertildi.
6 shildede Elorda kúni atalyp ótedi. Ol memlekettik mereke, sondyqtan qazaqstandyqtar bul kúni demalady.
2021 jyly qalaǵa 23 jyl toldy. Osy kúni Qazaqstannyń tuńǵysh prezidenti Nursultan Nazarbaev óziniń týǵan kúnin atap ótedi. Ol - 81 jasta.
