Elbasy Halyqaralyq saýda ortalyqtary qaýymdastyǵynyń basqarma múshesi (WTCA) Rolf Draakpen jáne «Nest Investments HOLDINGS» kompaniiasynyń korporativtik investitsiialar jónindegi direktory Mehran Efteharmen kezdesti, dep habarlaidy "Ult aqparat" Aqordaǵa silteme jasap.
Jiynǵa Prezident Ákimshiliginiń Basshysy Á.Isekeshev, Astana qalasynyń ákimi B.Sultanov jáne sáýletshi-dizainer Kennet Briýs Djeims Anderson qatysty.
Kezdesý barysynda Memleket basshysyna elordada Dúniejúzilik saýda ortalyǵynyń ǵimaratyn salý jónindegi joba usynyldy. Bul nysan tolyqtai shetel investitsiiasy esebinen boi kóteredi.
Nursultan Nazarbaev búgingi kezdesýdiń byltyr qazan aiynda Briýsselde ótken Qazaqstan-Eýropa biznes forýmy alańyndaǵy kelissózderdiń jalǵasy ekenin atap ótti.
– Biz Briýsselde sizderdiń usynystaryńyzdy talqylap, taǵy da kezdesý ótkizý jóninde ýaǵdalasqan edik. Halyqaralyq saýda ortalyqtary qaýymdastyǵynyń mundai jobalardy júzege asyrý isindegi mol tájiribesin eskersek, bizdiń yntymaqtastyǵymyz eki tarap úshin de jemisti bolady dep oilaimyn. Bul joba elordamyzdyń kelbeti men rýhyna sai kelip, onyń ajaryn asha túskenin qalar edim, – dedi Qazaqstan Prezidenti.
Elbasy Astananyń boi kóterý úderisine erekshe toqtalyp, ondaǵy ár sáýlet nysanynyń tarihy jóninde aitty.
Nursultan Nazarbaev Astananyń búkil Eýraziia qurlyǵynyń kindigi retinde batys pen shyǵys mádenietteriniń sáýlet stilin jáne salt-dástúrin boiyna sińirgenin atap ótti.
Sonymen qatar, Qazaqstan Prezidenti halyqaralyq «EKSPO-2017» mamandandyrylǵan kórmesiniń pavilondaryn salý barysy men nátijeleri jóninde aitty.
– Biz halyqaralyq «EKSPO-2017» kórmesin ótkizý quqyǵyna ie bolǵanda baiqaý jariialaǵan bolatynbyz. Diametri 80 metrlik «Nur Álem» sferasy álemdegi biregei nysan sanalady. Onyń qurylysyn ózim baqylap otyrdym. Búginde «EKSPO-2017» kórmesi infraqurylymynyń bazasynda «Astana» halyqaralyq qarjy ortalyǵyn, «Jasyl» tehnologiialardyń halyqaralyq ortalyǵyn, IT-startaptardyń halyqaralyq tehnoparkin ashtyq. Sondai-aq, munda Halyqaralyq IT-ýniversitet qurylady. Barlyq jobalar sinergiiasynyń mýltiplikativtik turǵydan oń áseri bolady dep oilaimyn, – dedi Nursultan Nazarbaev.
Halyqaralyq saýda ortalyqtary qaýymdastyǵynyń basqarma múshesi Rolf Draak kezdesýge jáne elordada jańa nysan salý jónindegi jobany talqylaýǵa múmkindik bergeni úshin Memleket basshysyna alǵys bildirdi.
«Nest Investments HOLDINGS» kompaniiasynyń korporativtik investitsiialar jónindegi direktory Mehran Eftehar óz kompaniiasy úshin saýda-ekonomikalyq bailanystardy keńeitý úderisindegi Astananyń strategiialyq turǵydan mańyzdylyǵyn atap ótti.
– Bizdiń investitsiialyq tobymyzǵa qarasty iri 18 dúniejúzilik saýda ortalyǵy bar. Mundai nysandardy qalai salyp, qalai basqarýdy bilemiz. «Bir beldeý, bir jol» aýqymdy jobasyna qatysý jónindegi bizdiń strategiialyq baǵytymyzda Qazaqstan, sonyń ishinde Astana mańyzdy oryn alady, – dedi M.Eftehar.
Sońynda Memleket basshysy Dúniejúzilik saýda ortalyǵynyń jańa ǵimaratynyń jobasyn maquldap, Astana qalasynyń ákimi B.Sultanovqa ony iske asyrý jónindegi birlesken jumystardy bastaýǵa tapsyrma berdi.
