- Qazaqstan Prezidenti Nursultan Nazarbaev elordada bastalǵan Siriia máselesin retteý jónindegi halyqaralyq kezdesýge (Astana protsesi) qatysýshylarǵa úndeý joldady.
Úndeýdi kelissózder barysynda QR Syrtqy ister ministri Qairat Ábdirahmanov oqyp berdi, dep habarlaidy Ult.kz tilshisi QazAqparat agenttigine silteme jasap.
«Siriia ahýalyn retteý jónindegi kelissózder qatysýshylaryna sálem joldaimyn. Siriiada oryn alǵan kúrdeli ahýal búkil álemdik qoǵamdastyqtyń nazaryn ózine aýdaryp otyr. Shamamen 6 jyl boiy jalǵasyp jatqan qantógis janjal túrli órkeniet pen mádeniet toǵysqan qasietti ólkege qaiǵy-qasiretten basqa eshteńe ákelmegendigin moiyndaýǵa májbúrmiz. Qazaqstan beibitsúigish el jáne BUU Qaýipsizdik keńesiniń turaqty emes múshesi retinde Taiaý Shyǵys óńirindegi qaýipsizdik pen turaqtylyqtyń ornap, beki túsýine múddelilik tanytady», - dep atap ótken QR Prezidenti.
Memleket basshysy búgingi kezdesý Siriiadaǵy ahýaldy beibit retteýge baǵyttalǵan halyqaralyq qoǵamdastyq kúsh-jigeriniń jarqyn úlgisi sanalatyndyǵyn basa aityp ótti.
«Qazaqstan Siriia ahýalyn sheshýdiń jalǵyz durys joly ózara senim men ózara túsinistikke negizdelgen kelissózder bolýy tiis dep sanaidy. Elimizdiń búgingi kelissózderdi ótkizý orny retinde tańdap alynýy da tosynnan emes. Ózderińizge belgili, 2015 jyly Astanada jekelegen siriialyq oppoziialyq toptar arasyndaǵy kelissózderdiń 2 raýndy ótti. Biz siriialyq bosqyndardyń beinetin jeńildetý úshin 700 myń dollardan astam qarjy bóldik, taiaýda azyq-túlik túrindegi 500 tonna gýmanitarlyq júk jónelttik. Astanadaǵy kezdesý barlyq múddeli taraptardyń BUU qamqorlyǵyndaǵy jenevalyq protsess aiasynda siriialyq daǵdarysty ońtaily sheshýdi qamtamasyz etetindigine jáne Siriiadaǵy beibitshilik pen turaqtylyqty ornatý isine laiyqty úles qosatyndyǵyna senim bildiremin. Nátijeli jáne tabysty kelissózder tileimin», - dedi Nazarbaev.
Barlyq quqyqtar qorǵalǵan. inform.kz belsendi siltemeni paidalanyńyz http://www.inform.kz/kz/nazarbaev-astana-procesine-katysushylarga-undeu-zholdady_a2991805
