Elbasy «Astana Bas jospary» ǵylymi-zertteý jobalyq institýty» jaýapkershiligi shekteýli seriktestiginde boldy, dep habarlaidy "Ult aqparat" Aqordaǵa silteme jasap.
Memleket basshysy elordany abattandyrý jónindegi jobalardyń iske asyrylý barysymen, sondai-aq qalanyń infraqurylymdyq jáne áleýmettik-mádeni nysandarynyń qurylys josparymen tanysty.
Nursultan Nazarbaev Astanada jańa sáýlet jáne logistika ǵamarattaryn salý kezinde qala qurylysy salasyndaǵy álemdik jetistikterdi zerttep, olardy qoldaný qajettigin atap ótti.
Qazaqstan Prezidenti qaladaǵy ómir súrý sapasy men jaily turmys deńgeiin arttyrýǵa baǵyttalǵan áleýmettik jobalardy iske asyrýdyń mańyzdy ekenin aitty.
Sonymen qatar, Memleket basshysy elordanyń 20 jyldyǵyna arnalǵan merekelik is-sharalardy uiymdastyryp, ótkizý máselesine basa nazar aýdardy.
– Biz 20 jyl ishinde Uly Dalanyń dál ortasynda búkil álemge tanylǵan jańa ásem qala turǵyzdyq. Bul qala halqymyzdyń maqtanyshyna ainaldy. Árine, bul – qala ákimshiliginiń, qurylysshylardyń, sáýletshiler men osy úderiske atsalysqan kóptegen adamnyń mańdai teriniń jemisi. Biz biyl elordamyzdyń 20 jyldyǵyn toilaimyz. Qonaqtarymyzdyń bárine elordanyń jiyrma jylda qol jetkizgen tartymdylyǵyn, ásemdigin jáne tynys-tirshiliginiń joǵary deńgeide ekenin kórsetýimiz qajet, – dedi Elbasy.
Sondai-aq, Astana qalasynyń ákimi elordany odan ári damytý jáne qala turǵyndarynyń ómir súrý jaǵdaiyn jaqsartýdyń negizgi kórsetkishterine qol jetkizý úshin atqarylyp jatqan jumystar jóninde baiandady.
Sońynda Nursultan Nazarbaev birqatar naqty tapsyrma berdi.
.jpeg)