Nursultan Nazarbaev Mádeniet jáne sport ministri Arystanbek Muhamediulyn qabyldady, dep habarlaidy Aqordanyń baspasóz qyzmeti.
Kezdesý barysynda ministrlik qyzmetiniń mańyzdy baǵyttary, sonyń ishinde kinematografiiaǵa qatysty zańnamany odan ári jetildirý jáne týrizm men sport salalaryn damytý sharalary talqylandy.
Mádeniet jáne sport ministriniń málimetine sáikes, qazirgi ýaqytta «Kinematografiia týraly» zań jobasy Parlamenttiń qaraýynda jatyr. Bul zań jobasy ulttyq kinony qalyptastyrý isin qoldaý tetikteriniń tiimdiligin arttyrýǵa, Qazaqstannyń filmderin, sondai-aq sheteldiń jetekshi kompaniialarymen birlesip túsirgen kino ónimderin halyqaralyq naryqqa keń kólemde shyǵarýǵa baǵyttalǵan.
Sonymen qatar, A.Muhamediuly Memleket basshysyna 2023 jylǵa deiingi týrizmdi damytý jónindegi memlekettik baǵdarlamalardyń ázirlený barysy jáne «Qazaqstandyqtardyń ál-aýqatynyń ósýi: tabys pen turmys saltyn arttyrý» atty joldaýdaǵy dene shynyqtyrý-saýyqtyrý keshenderin salýǵa qatysty tapsyrmanyń oryndalýy jóninde baiandady.
Kezdesý qorytyndysy boiynsha Qazaqstan Prezidenti birqatar naqty tapsyrma berdi.
