Qazaqstan Prezidenti «Otan qorǵaýshylar» monýmentine gúl shoǵyn qoiý rásimine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Uly Otan soǵysy qaharmandarynyń rýhyna taǵzym etip, monýmentke gúl shoǵyn qoidy.
Saltanatty shara sońynda Elbasy «Stýdentter» saiabaǵyndaǵy shatyrlar qalashyǵyna bardy jáne buqaralyq aqparat quraldarynyń ókilderi aldynda sóz sóiledi.
Nursultan Nazarbaev soǵys ardagerlerine alǵys aityp, olardy quttyqtady, sondai-aq jaýǵa qarsy kúreste kórsetken erligi men janqiiarlyǵyn atap ótti.
– Soǵys ardagerleri bizdiń baqytty ómirimizge, táýelsizdigimizge jáne aspanymyzdyń ashyq bolýyna jol ashty. Biz búgin «Otan qorǵaýshylar» monýmentine gúl shoǵyn qoiyp, halqymyzdyń maidandaǵy jáne tyldaǵy qaharmandyǵy men eńbegine degen zor qurmetimizdi bildiremiz, – dedi Qazaqstan Prezidenti.
Memleket basshysy Ekinshi dúniejúzilik soǵys adamzat tarihynda ondaǵan million adamnyń ómiri qiylǵan eń qanquily soǵys bolǵanyn aitty.
– Qaza tapqandardyń qatarynda qazaqstandyqtar da boldy. Respýblikamyzdyń 6 million halqynyń 20 paiyzy maidanǵa attandy. Olardyń jartysy qaita oralǵan joq, – dedi Nursultan Nazarbaev.
Elbasy Jeńistiń Qazaqstan táýelsizdigi tarihyndaǵy mańyzdy róline toqtalyp, oǵan el halqynyń birligi arqasynda qol jetkizilgenin atap ótti.
– Bizdiń ardagerlerge degen qurmetimiz olardyń uly erliginen kem túspeýge tiis. Jeńiske eń aldymen elimizdegi barlyq halyqtyń birliginiń, baýyrmaldyǵynyń jáne dostyǵynyń nátijesinde qol jetti. Biz qazir de osy uranmen ómir súrip kelemiz, – dedi Qazaqstan Prezidenti.
Sońynda Memleket basshysy barsha qazaqstandyqtardy Jeńis kúnimen taǵy da quttyqtap, zor densaýlyq jáne baq-bereke tiledi.
