Memleket basshysy Amerika Qurama Shtattarynyń isker toptar ókilderimen kezdesti, "Ult aqparat" Aqordanyń baspasóz qyzmetine silteme jasap.
Qazaqstan Prezidenti dóńgelek ústel qatysýshylarymen kezdesý uiymdastyrylǵany úshin rizashylyq bildirdi.
Nursultan Nazarbaev Qazaqstan men AQSh arasynda ornyqqan qatynastardyń mańyzdylyǵy men strategiialyq sipatyna toqtaldy.
– Amerika Qazaqstan ekonomikasyna salynǵan tikelei investitsiialardyń kólemi boiynsha ekinshi orynda. Táýelsizdik jyldary ishinde sizderdiń kompaniialaryńyz tarapynan Qazaqstanǵa 50 milliard dollardan astam investitsiia quiyldy. Ótken jyly eki el arasyndaǵy taýar ainalymy 2 milliard dollarǵa jetti. Bizdiń elde energetika, kólik, innovatsiia, meditsina jáne basqa da salalarda Amerika kapitalynyń qatysýymen 500-den asa kompaniia tabysty jumys istep keledi. Bizdiń iri seriktesterimizdiń qatarynda Shevron, Ekson Mobil, Djeneral Elektrik, Hellibiorton jáne basqa da kompaniialar bar, – dedi Nursultan Nazarbaev.
Memleket basshysy eki jaqty qatynastardyń keń aýqymyn qamtityn Keńeitilgen strategiialyq áriptestik týraly birlesken málimdemeni qabyldaýdyń erekshe mańyzdylyǵyn atap ótti.
Sondai-aq, Nursultan Nazarbaev Qazaqstannyń kólik-tranzittik áleýetin damytý úderisine toqtalyp, biznes júrgizý úshin memleket tarapynan jaǵdai jasaýǵa baǵyttalǵan sharalar jóninde áńgimeledi.
– Investitsiialyq ahýaldy jaqsartyp, investorlardyń quqyqtaryn qorǵaý úshin turaqty jumystar júrgizilýde. Qazaqstan Ekonomikalyq yntymaqtastyq jáne damý uiymynyń Investitsiialar jónindegi komitetiniń qaýymdastyrylǵan múshesi boldy jáne Halyqaralyq investitsiialar jónindegi deklaratsiiaǵa qosyldy. 62 eldiń, sonyń ishinde AQSh azamattary úshin bizde vizasyz rejim engizildi. Kásipkerlik salasyndaǵy zańnama jetildirilýde. 11 arnaiy ekonomikalyq aimaq jáne 22 indýstriialyq aimaq jumys isteýde. Onda qajetti infraqurylym men jeńildikter kózdelgen, – dedi Qazaqstan Prezidenti.
Sonymen qatar, Memleket basshysy Qazaqstan ekonomikasyn tsifrlandyrý jáne óndiriske innovatsiiany engizý barysyna erekshe nazar aýdardy.
– «Tsifrlyq Qazaqstan» arnaiy memlekettik baǵdarlamasy qabyldandy. Osyǵan orai, ekonomika salalaryn tsifrlandyrý jáne innovatsiialyq ekojúieni damytý jónindegi jobalardy júzege asyrý mańyzdy bolyp sanalady. Máselen, Nazarbaev Ýniversiteti jáne Innovatsiialyq tehnologiialar parki siiaqty innovatsiialyq klasterler jumys isteýde. Biyl Astanada IT-startaptardyń jańa halyqaralyq tehnoparki ashylady. Osynyń bári yntymaqtastyǵymyz úshin perspektivti baǵyt bola alady, – dedi Nursultan Nazarbaev.
Qazaqstan Prezidenti amerikalyq biznesmenderge arnalǵan sózinde agroónerkásip keshenindegi birlesken jobalardy júzege asyrý úshin sheteldik investorlardy qatysýǵa shaqyrdy.
Budan bólek, Memleket basshysy elimizdegi jekeshelendirý baǵdarlamasynyń iske asyrylý barysy jáne «jasyl ekonomika» salasyndaǵy jobalardy damytý perspektivasy týraly aitty.
– Ótken jyly «Bolashaqtyń energiiasy» atty taqyrypta Halyqaralyq «EKSPO-2017» mamandandyrylǵan kórmesin tabysty ótkizdik. Bul kórme búkil planetanyń «taza» energetika salasyndaǵy joǵary tehnologiialyq jáne ziiatkerlik áleýetin kórsetýge keremet múmkindik týǵyzdy. Kórme murasy innovatsiialyq jáne ornyqty damý mindetterine ári qarai da qyzmet ete beretin bolady. Atap aitqanda, EKSPO infraqurylymynyń bazasynda «Jasyl» tehnologiialardy jáne investitsiialardy damytý jónindegi halyqaralyq ortalyq jumys isteitin bolady. Ol elimizde jáne óńirde «jasyl» jobalardy júzege asyrýǵa septigin tigizýge arnalǵan, – dedi Qazaqstan Prezidenti.
Sondai-aq, Nursultan Nazarbaev «Astana» halyqaralyq qarjy ortalyǵynyń erekshe mártebesin atap ótip, onyń jumysynyń aldaǵy josparlaryna toqtaldy.
– «Astana» halyqaralyq qarjy ortalyǵynyń qatysýshylaryna 50 jylǵa deiin salyqtyq, valiýtalyq, vizalyq jáne eńbek rejimderi siiaqty jeńildikter beriledi. Bul – jumysy aǵylshyn quqyǵyna negizdelgen óńirdegi birden-bir ortalyq. «Astana» halyqaralyq qarjy ortalyǵynyń joǵary tehnologiialyq birjasyn qurýǵa Shanhai qor birjasy jáne NASDAQ amerikalyq birjasy tartyldy. «Astana» halyqaralyq qarjy ortalyǵynyń «jasyl», islamdyq jáne innovatsiialyq qarjylyq quraldardy damytý jónindegi óńirlik ortalyqqa ainalýyna barlyq múmkindigi bar. Jaz aiynda biz halyqaralyq qoǵamdastyq úshin «Astana» halyqaralyq qarjy ortalyǵynyń resmi tanystyrylymyn ótkizýdi josparlap otyrmyz, – dedi Memleket basshysy.
Sońynda Qazaqstan Prezidenti ótkizilgen kezdesýdiń eki eldiń jaqyndasýyna jáne ózara tiimdi áriptestikti nyǵaitýǵa serpin beretinine senim bildirdi.
