Keshe Nursultan Nazarbaev Almaty qalasynyń ákimi Baýyrjan Baibekti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Qazaqstan Prezidentiniń Almatydaǵy rezidentsiiasynda ótken kezdesý barysynda Baýyrjan Baibek Memleket basshysyna qalanyń áleýmettik-ekonomikalyq damýy jóninde atqarylyp jatqan jumystar týraly baiandady.
Nursultan Nazarbaev Almaty respýblika ekonomikasynda mańyzdy ról atqaratynyn atap ótip, qalany damytý máselelerin udaiy nazarda ustaitynyn aitty. "Eger qala halqy 2 million adamnan assa, ol ekonomikalyq turǵydan ózin ózi tolyq qamtamasyz ete alady. Qala jańa múmkindikter týǵyzyp, shaǵyn jáne orta biznestiń damýyna jol ashady. Mundai qalalar shikizatsyz-aq kórkeiip, elimizdi órkendetýge úles qosady", – dedi Elbasy.
Qazaqstan Prezidenti Almatyny gazben qamtý jáne onyń ekologiiasyn jaqsartý máselelerine nazar aýdardy. "Bizge elektr stantsiialary men turǵyn úilerdi gazben qamtý, qoǵamdyq jáne jeke avtokólikterdi gazǵa kóshirý baǵytyndaǵy jumystardy jalǵastyrý qajet. Keleshekte biz Almaty men Astanada tek elektromobilmen júretin jaǵdaiǵa jetýimiz kerek", – dedi Memleket basshysy.
Almaty qalasynyń ákimi Elbasyǵa qaladaǵy úlken ainalma avtomobil joly qurylysynyń bastalǵanyn aityp, oǵan 1,5 milliard AQSh dollary kóleminde investitsiia tartylǵanyn málimdedi. "Bul joba iske asyrylǵan kezde qaladaǵy kólik aǵynyn kúnine 10 paiyzǵa nemese 40-60 myń avtomobilge azaitýǵa múmkindik beredi. Ol qalanyń ekologiialyq jaǵdaiyn jaqsartyp, Almatynyń kólik-logistika jelisin "Batys Eýropa – Batys Qytai" júiesine qosatyn bolady", – dedi Baýyrjan Baibek.
Sonymen qatar, kezdesý barysynda ónerkásip kásiporyndaryn qala syrtyna kóshirý máseleleri talqylanyp, azamattardyń áleýmettik turǵydan osal toptaryn turǵyn úimen qamtamasyz etý jóninde Almaty qalasy ákimdigi qabyldap jatqan sharalar qarastyryldy. "Biyl 6 myńǵa jýyq jaldamaly páter, onyń ishinde Atletter qalashyǵynda 1 748 páter berildi. Osylaisha, kezekte turǵan árbir úshinshi otbasy turǵyn úimen qamtamasyz etildi", – dedi qala ákimi.
Kezdesý sońynda Nursultan Nazarbaev Almaty qalasyn odan ári damytý jóninde birqatar naqty tapsyrma berdi.
