Nursultan Nazarbaev Almaty oblysyna jumys saparynyń qorytyndysy boiynsha buqaralyq aqparat quraldarynyń ókilderi úshin brifing ótkizdi, dep habarlaidy "Ult aqparat" Aqordaǵa silteme jasap.
Memleket basshysy otandyq BAQ ókilderi úshin brifing ótkizip, óńirdi damytýdyń negizgi baǵyttary jáne jumys saparynyń qorytyndylary boiynsha oblys basshylyǵyna berilgen tapsyrmalar jóninde aitty.
– Meniń tapsyrmalarymnyń bári oblysta tolyq oryndalýda. Bul óńirdegi jumystardyń bastamasy jaqsy dep sanaimyn. Úsh jylda 3 million sharshy metrden astam turǵyn úi paidalanýǵa berildi. Tek byltyrdyń ózinde 35 mektep salyndy, – dedi Elbasy.
Sonymen qatar Qazaqstan Prezidenti «Bes áleýmettik bastamanyń» óńirdegi iske asyrylý barysyna oń baǵa berip, oblystyń týristik áleýetin damytý qajettigi týraly aitty.
– Jumys saparym barysynda Alakólge baryp, onyń týristik klasterimen tanystym. Barsha qazaqstandyqtarǵa bizde tamasha demalys orny bar ekenin aitqym keledi. Bul jer osyǵan deiin igerilmegen bolatyn. Onyń infraqurylymy da, qonaq úileri de bolmaǵan edi. Búginde bul óńirde biznes ókilderi belsendi túrde jumys isteýde. Kóldiń jaǵasynda álemdik standarttarǵa sai keletin bes juldyzdy qonaq úi salyndy, – dedi Elbasy.
Nursultan Nazarbaev óńirdegi infraqurylymdyq jobalardy iske asyrýdyń qazirgi nátijeleri men aldaǵy josparlary jóninde áńgimeledi.
– Memleket keremet jaily «Almaty – Taldyqorǵan» jolyn salyp berdi. Bul Alakól arqyly Shyǵys Qazaqstanǵa aparatyn ótpeli jol bolady. Jol salýdyń arqasynda kóp jumys orny ashylady, – dedi Memleket basshysy.
Sondai-aq, Elbasy óńirdiń negizgi ekonomikalyq kórsetkishteri oń qarqyn alyp otyrǵanyn atap ótip, oblystyń damý barysyna toqtaldy.
– Almaty oblysy, ásirese agrarlyq salada, bárine úlgi bolyp otyr. Óńir ekonomikasy 4,2 paiyzǵa ósti, bul elimizdegi ortasha kórsetkishten joǵary. Aýyl sharýashylyǵy men qurylys salalary órkendep, iske qosylǵan áleýmettik nysandar kóbeiip keledi, – dedi Nursultan Nazarbaev.
Sonymen birge Qazaqstan Prezidenti oblys basshylyǵy tarapynan erekshe nazar aýdarýdy qajet etetin mindetterge toqtaldy.
– Oblystyń búkil ekonomikasy 3-4 aýdanda shoǵyrlanǵan. Onyń ózi tek ónerkásipti qamtidy. Osy aýdandar óńir ekonomikasynyń 70 paiyzyn qamtamasyz etip otyr. Basqa aýdandar baiaý damýda, osy máselege nazar aýdarý kerek, – dedi Elbasy.
Sonymen qatar Nursultan Nazarbaev osy óńirde mal sharýashylyǵy men aýyl sharýashylyǵy ónimderin qaita óńdeý sektoryn damytý qajettigi jóninde aitty.
.jpeg)