Qazaqstan prezidenti Nursultan Nazarbaev 2020 jyldan bastap eńbek qabiletin joǵaltqan azamattar men asyraýshysynan aiyrylǵan otbasylarǵa tólenetin áleýmettik tólemderdi 30%-ke ósirýdi tapsyrdy, dep habarlaidy Sputnik Qazaqstan tilshisi.
Nazarbaev byltyr áleýmettik kómekter ájeptáýir ulǵaiǵanyn atap ótti.
"Úkimetke 2020 jyldyń 1 qańtarynan bastap eńbek qabiletin joǵaltqan jáne asyraýshysynan aiyrylǵan azamattarǵa tólenetin áleýmettik tólemniń ósimin 30 protsentke deiin qamtamasyz etýdi tapsyramyn. Madina (Ábilqasymova, eńbek jáne halyqty áleýmettik qorǵaý ministri), muny jasaý múmkin be?", — dep surady prezident úkimettiń keńeitilgen otyrysynda.
Ábilqasymovanyń aitýynsha, tiisti túzetýler zańnamaǵa engizilgen.
"Zań jobasy ázirlendi, naýryz aiynda parlamentke engizip, tapsyrmany oryndaimyz", — dep sendirdi ministr.
Sondai-aq, vedomstvo basshysy Qazaqstanda alǵash ret múgedekterdi qorǵaý boiynsha keshendi biriktirilgen jospar ázirlenip jatqanyn málimdedi.
"Bul inkliýzivti bilim berý, jumyspen qamtý, múgedektiktiń aldyn alý, kedergisiz orta, áleýmettik qyzmetter sapasyn arttyrý máseleleri", — dedi Ábilqasymova.
