Nur Otan partiiasynyń tóraǵasy Nursultan Nazarbaev Álemdik saiasi partiialar kóshbasshylarynyń sammitine qatysty, dep habarlaidy Elbasynyń baspasóz qyzmeti.
Qazaqstannyń Tuńǵysh Prezidenti beinekonferentsiia rejiminde Qytai Kommýnistik partiiasynyń 100 jyldyǵyna arnalǵan Álemdik saiasi partiialar kóshbasshylarynyń sammitine qatysty.
Nursultan Nazarbaev Qytai Halyq Respýblikasynyń tóraǵasy Si Tszinpinge bul saiasi is-sharaǵa qatysýǵa shaqyryp, sóz bergeni úshin rizashylyq bildirdi.
– Búgingi sammittiń «Halyqty baqytqa bastaý – saiasi partiialardyń jaýapkershiligi» atty taqyryby óte ózekti, ol men basqaratyn «Nur Otan» saiasi partiiasy jumysynyń negizgi mánin kórsetedi. Biyl meniń elimniń táýelsizdigine 30 jyl tolady. Basty saiasi kúsh retinde biz alǵashqy kúnnen bastap partiianyń negizgi basymdyqtaryn aiqyndap aldyq: halyq pen tutas qoǵamnyń ál-aýqatyn arttyra almasa – partiianyń jeńisteri men jetistikteriniń qundylyǵy bolmas edi, – dedi Elbasy.
Elbasy Qazaqstannyń táýelsizdik jyldaryndaǵy jetistikterine erekshe toqtalyp, oǵan kóbine «Nur Otan» partiiasyna otandastarymyzdyń tarapynan kórsetilgen senim men qoldaýdyń arqasynda qol jetkenin atap ótti.
– Biz áleýmettik baǵdar ustanǵan el retinde azamattardyń laiyqty turmysy men Qazaqstannyń jańǵyrýyn qamtamasyz etý jumysyn ári qarai jalǵastyramyz. Bizdiń maqsatymyz – 2050 jyly álemdegi damyǵan 30 eldiń qataryna qosylý, – dedi Nursultan Nazarbaev.
Sonymen qatar Elbasy Qytai tarapy bastamashy bolǵan saiasi birlestikter deńgeiindegi kópjaqty dialogqa arnalǵan jańa tuǵyrnamany damytý týraly óz oiyn ortaǵa saldy.
– Covid-19 pandemiiasy jahandyq syn-qaterlerdi halyqaralyq áriptestik pen bir-birimizdi qoldaý arqyly ǵana tiimdi eńsere alatynymyzdy taǵy bir márte dáleldedi. Bul tusta saiasi partiialar mańyzdy ról atqara alady jáne atqarýy kerek. Osy oraida halyqaralyq qatynastardyń qazirgi modeli teń quqyqqa, barlyq taraptardyń dástúrlerin, qundylyqtary men erekshelikterin qurmetteýge negizdelýge tiis ekeni anyq, – dedi Qazaqstannyń Tuńǵysh Prezidenti.
«Nur Otan» partiiasynyń tóraǵasy qazir álemniń barlyq elderi arasynda Covid-19-ǵa qarsy vaktsinalardy birkelki jáne ádil taratý isinde kooperatsiialyq tásildi paidalaný qajettigin aitty.
Elbasy sondai-aq saiasi partiialardyń jahandyq syn-qaterlerdi barynsha azaitý jáne damýdaǵy teńsizdikti azaitý baǵytyndaǵy jumysynyń mańyzdylyǵyn atap ótti.
– Álemde bizdiń aýditoriianyń úni áldeqaida aiqyn ári qattyraq estilgeni jón. Atap aitqanda, saiasi partiialar geosaiasi shielenisti eńserýge úles qosý úshin ózara yqpaldastyqty arttyra túsýi kerek dep sanaimyn, – dedi Nursultan Nazarbaev.
Sońynda Elbasy «Nur Otan» partiiasy men Qytai Kommýnistik partiiasy Qazaqstan men Qytai Halyq Respýblikasy arasyndaǵy máńgilik jan-jaqty strategiialyq seriktestikti nyǵaitýǵa zor úles qosyp jatqanyn aitty.
