Astanadaǵy EKSPO Kongrec ortalyǵynda Alash partiiasynyń qurylǵanyna 100 jyl tolýyna orai «Rýhani jańǵyrý: Alash jáne Azattyq ideiasynyń sabaqtastyǵy» atty halyqaralyq ǵylymi-tájiribelik konferentsiia bastaldy, dep habarlaidy «QazAqparat».
Halyqaralyq deńgeidegi jiynǵa elimizdegi beldi alashtanýshylar, QR Memlekettik hatshysy Gúlshara Ábdiqalyqova, Parlament Májilisiniń depýtattary, Túrkiia, Resei, Ázerbaijan elderinen ǵalymdar qatysýda. Jiyn barysynda Gúlshara Ábdiqalyqova qatysýshylarǵa QR Prezidenti Nursultan Nazarbaevtyń quttyqtaý sózin oqyp berdi.
«Barshańyzdy konferenitsia jumysynyń bastalýymen shyn júrekten quttyqtaimyn! Alash qozǵalysynyń 20 ǵasyrdyń basyndaǵy qazaq qaýymynyń saiasi-áleýmettik quqyqtaryn qorǵaý, ulttyq biregeiligin saqtap qalý jolyndaǵy kúresi elge qyzmet etýdiń jarqyn kórinisteriniń biri. Alash qozǵalysynyń passionarlyq ideialary bizdiń ata-babalarymyzdyń azattyq alyp, derbes memleket qurý jolyndaǵy san ǵasyrlyq amanatymen ushtasyp jatyr. Sol kezdegi ult ziialylary arman etken memleket táýelsizdigi men ult bostandyǵyna búgingi urpaq qol jetkizdi. Elimiz egemendik alyp, álemniń aldyńǵy qatarly memleketterimen terezesin teńestirip otyr. Men «Bolashaqqa baǵdar: Rýhani jańǵyrý» atty maqalamda taǵylymy mol tarihymyzdy zerdeleýge, tóltýma mádenietimizdi qoldaýǵa qatysty naqty mindetterdi atap kórsettim. Bizdiń qoǵamdyq sanany qazirgi zamannyń talabyna sai jańǵyrtý arqyly elimizdiń turaqty damýyn qamtamasyz etýdi maqsat etip otyrmyz. Memleketimizdiń ekonomikalyq áleýeti arqyly halqymyzdyń bai tarihi ári rýhani murasyn dáripteýge de zor múmkindik jasala bermek. Búgingi keleli jiynda tarihymyzdyń táýelsiz el ómirimen sabaqtastyǵyn ashyp kórsetetin dáiekti pikirler, ǵylymi izdenisterdiń nátijeleri jariia etiledi dep kámil senemin. Konferentsiianyń jumysyna tabys tileimin», - dep Gúlshara Ábdiqalyqova Elbasynyń quttyqtaý hatyn aiaqtady.
Konferentsiianyń Plenarlyq májilisi HH ǵasyr basyndaǵy álemdi silkindirgen oqiǵalar aiasyndaǵy Alash qozǵalysynyń qyzmetin ashyp kórsetken sektsiialyq basqosýlarǵa ulaspaq. Jiyn sońynda ǵylymi-tájiribelik konferentsiiaǵa qatysýshylar Alash arystaryn ulyqtaý, olardyń muralaryn zertteýdi júielep, jas urpaqty patriottyq rýhqa tárbieleý isin Alash murattarymen sabaqtastyrý máseleleri kórinis tapqan qarar qabyldaý josparlanyp otyr.
