Elbasy Almaty oblysyna jumys saparymen bardy, dep habarlaidy "Ult aqparat" Aqordaǵa silteme jasap.
Qazaqstan Prezidenti Almaty oblysynyń Úsharal qalasyna kelgennen keiin jańa áýejaidyń qyzmetimen jáne oblystyń shaǵyn aviatsiia salasyn damytý perspektivalarymen tanysty.
Alakól aýdanynyń Aqshi kenti stansasyndaǵy temir jol vokzalynyń jańa ǵimaratyn aralap kórgen soń, Memleket basshysynyń tóraǵalyǵymen elimizdiń týrizm salasyn jáne kólik-logistika infraqurylymyn damytý máseleleri jóninde keńes ótti.
Jiyn barysynda óńir basshysy Amandyq Batalov Nursultan Nazarbaevqa Almaty oblysyndaǵy týrizmniń damý barysy jóninde baiandady.
– Sońǵy tórt jylda oblysta týristik qyzmet kórsetý kólemi eki ese artty. Bul kórsetkish 2014 jyly 3,9 milliard teńgeni qurasa, 2017 jyly 8,3 milliard teńgege ósti. 2018 jyly muny 10 milliard teńgege deiin jetkizýdi josparlap otyrmyz. Alakól aýdanynda kórsetilgen qyzmet kólemi 2017 jyly 3,5 milliard teńgege jetip, 2014 jylǵy deńgeimen salystyrǵanda 8 ese artty, – dedi Almaty oblysynyń ákimi.
Investitsiialar jáne damý ministri Jeńis Qasymbek «Nurly jol» infraqurylymdy damytýdyń memlekettik baǵdarlamasynyń jergilikti jáne respýblikalyq mańyzy bar avtomobil joldaryn salýǵa qatysty bóliginiń iske asyrylý barysy jóninde baiandady.
– 2017 jyly respýblikalyq mańyzy bar 4 myń shaqyrymnan astam avtomobil jolyna jóndeý jumystary júrgizildi. Sonyń ishinde 603 shaqyrym jol paidalanýǵa berildi. Jalpy, 2022 jylǵa deiin 24 myń shaqyrym joldyń barlyǵy bir qalypqa keledi degen oidamyz, – dedi Investitsiialar jáne damý ministri.
Sondai-aq, keńeste «Qazaqstan temir joly» UK» AQ prezidenti Qanat Alpysbaev Memleket basshysyna Alakól demalys aimaǵynyń 2020 jylǵa deiingi kóliktik qoljetimdi kartasyn tanystyryp, tranzittik tasymaldaý isin damytý strategiiasynyń júzege asyrylýy barysy jóninde baiandady.
Mádeniet jáne sport ministri Arystanbek Muhamediuly ishki jáne syrtqy týrizmdi damytý jolynda barlyq kedergilerdi alyp tastaý maqsatymen Qazaqstan halqyna arnalǵan Joldaýda aitylǵan tapsyrmalardyń iske asyrylýy, sonymen qatar EKSPO-nyń jaǵymdy áserin qoldaý úshin ministrlik tarapynan atqarylyp jatqan sharalar jóninde baiandady.
– Elimiz týrizmniń ekonomikalyq áserin is júzinde EKSPO-ny ótkizý barysynda sezindi. Sol kezde Qazaqstanǵa 7 millionnan astam týrist keldi. Bul ótken jylmen salystyrǵanda 18 paiyzǵa kóp. Ishki týrizm legi 20 paiyzǵa artyp, shamamen 6 million adamǵa jetti, – dedi vedomstvo basshysy.
Keńes qorytyndysy boiynsha jáne týristik klaster nysandaryn aralaǵannan keiin Nursultan Nazarbaev Qazaqstannyń týrizm salasyn odan ári damytý úshin ortalyq memlekettik jáne jergilikti aqtarýshy organdarǵa birqatar tapsyrma berdi.
– Alakól Qazaqstan boiynsha eń kóp demalýshy baratyn jerge ainalýy kerek. Ol yńǵaily jerde ornalasýymen erekshelenip, barlyq óńirdiń turǵyndary úshin qoljetimdi bolyp otyr. Kóldiń biregeiligi sýynyń emdik qasietine bailanysty. Onyń quramynda radon, silti jáne basqa da paidaly elementter bar. Osyǵan bailanysty Alakól elimizdiń týrizm salasy úshin óte mańyzdy, – dedi Memleket basshysy.
Odan keiin Elbasy «Atameken business city» kórme keshenine bardy. Kórme keshenine baryp, onyń jumysymen tanysty.
Amandyq Batalov Memleket basshysyna «Tsifrlyq Qazaqstan», «Rýhani jańǵyrý» baǵdarlamalary men «Prezidenttiń bes áleýmettik bastamasynyń» Almaty oblysynda júzege asyrylý barysy jóninde baiandady.
Qazaqstan Prezidenti Almaty oblysynyń artyqshylyqtaryna toqtalyp, týristik klasterdi damytý úshin tabiǵi-klimattyq jaǵdaiy qolaily ári geografiialyq turǵydan utymdy ornalasqanyn jáne áleýetiniń zor ekenin de atap ótti.
