QR Prezidenti Nursultan Nazarbaev aqparat jáne kommýnikatsiia ministri Dáýren Abaevpen kezdesti, - dep habarlaidy Ult.kz tilshisi Aqordaǵa silteme jasap.
Kezdesý barysynda Memleket basshysy tiimdi aqparattyq saiasat júrgizýdiń, eldegi media keńistiktiń qaýipsizdigin qamtamasyz etýdiń mańyzdylyǵyn atap ótti.
– Jańadan qurylǵan ministrliktiń mańyzy zor. Búginde basty mindetterdiń biri – aqparat keńistigindegi túrli syn-qaterlerge tiimdi qarsy tura bilý. Sonymen qatar, halyq arasynda ekonomikalyq ósimdi jáne turǵyndardyń ál-aýqatyn arttyrýdy qamtamasyz etý baǵytynda memleket qabyldap otyrǵan sharalar týraly túsindirý jumysyn tiisti deńgeide júrgizý qajet, – dedi Qazaqstan Prezidenti.
Budan bólek, Nursultan Nazarbaev memlekettik BAQ-tyń basshylyq quramyn qalyptastyrý isine muqiiat bolý qajettigine nazar aýdardy.
– Joǵarǵy talaptarǵa sai keletin, shetel tilderin meńgergen jáne aqparat keńistiginiń basty úrdisterine sapaly taldaý jasai alatyn adamdardy tańdaý kerek. Jalpy, memlekettik aqparat saiasatynyń máseleleri meniń basty nazarymda. Ministrliktiń qyzmetine tikelei ózim jáne Prezident Ákimshiliginiń basshysy baqylaý jasaidy. Basqa tulǵalardyń aralasýyna jol berilmeidi, – dedi Memleket basshysy.
Aqparat jáne kommýnikatsiialar ministri BAQ jumysynyń tiimdiligin arttyrý, sondai-aq «bir tereze» qaǵidaty boiynsha halyqqa memlekettik qyzmetter kórsetý isin ilgeriletý jóninde qabyldanyp otyrǵan sharalar týraly baiandady.
Sondai-aq, D.Abaev Qazaqstan Prezidentin telekommýnikatsiia salasynyń qyzmet etý sapasyn arttyrýdaǵy ministrliktiń qyzmeti, sonyń ishinde «Sandyq Qazaqstan» baǵdarlamasyn ázirleý jumysy týraly habardar etti.
Ult portaly
