QR Prezidenti Nursultan Nazarbaevtyń aitýynsha, tehnologiialyq jańǵyrtýdy oidaǵydai atqarý úshin adam kapitalyn damytý qajet. Kásibi mamandardy tirnektep júrip jinaý kerek. Onsyz alǵa qoiylǵan maqsattardy iske asyrý múmkin emes, dep habarlaidy QazAqparat tilshisi.
«Bizde bilim salasy da, ǵylym salasy da indýstriialandyrý maqsattaryna sai bolýy qajet. Kásibi ári bilikti mamandar bolmasa, eshqandai indýstriialandyrý da, tsifrlandyrý da bolmaidy. Al ondai mamandardy tirnektep júrip jinap, naqty maqsattarǵa jumyldyrý kerek. Olardyń oilap tapqan tehnologiialaryn qoldanysqa engizgen jón. «Bolashaq» baǵdarlamasy da, Nazarbaev ýniversiteti de, jalpy barlyq ýniversitetter soǵan jumys isteýi kerek. Ziiatkerlik mektepter daryndy balalardy iriktep jatyr. Negizi, qazir jumysty 25-30 jastaǵy azamattarǵa berý kerek. Odan qorqatyn eshteńe joq. Bárimizdi alǵa jeteleitin solar. Kedergi jasamai, olarǵa jol berý kerek», - dedi Prezident búgin jalpyulttyq telekópir kezinde.
Memleket basshysy «100 jańa esim» jobasyn da eske alyp, daryndy jastardy qoldaý máselesine toqtaldy.
«Jaqynda men «100 jańa esim» jobasyna kirgen azamattarmen kezdestim. Onda men múldem basqa adamdardy kórdim, olar zaman talabyna sai oilaidy, kózqarasy da basqasha. 18-20 jastaǵy balalar oiǵa kelmeitin nárselerdi jasap júr. Mysaly, bir jigit ýniversitet jertólesinde otyryp, arnaiy rozetkany oilap tapty. Sonyń arqasynda energiianyń 30 paiyzyn únemdeýge bolady. Shetelde ony birden baiqaityn edi», - dep atap kórsetti Nursultan Ábishuly.
Aita keteiik, Prezidenti Nursultan Nazarbaev sheteldegi qarjyny qaitarýǵa qatysty arnaiy zańnamany da ázirleýdi tapsyrdy. Atalǵan mindet Úkimet basshysy Baqytjan Saǵyntaevqa júkteldi.
.jpeg)