«Nur Otan» partiiasynyń Tóraǵasy Nursultan Nazarbaev Baýyrjan Baibekti qabyldady. Bul týraly elbasy.kz saity habarlady.
Kezdesýde jýyrda ótken praimerizdiń nátijeleri talqylandy.
Partiia Tóraǵasy birinshi orynbasarynyń aqparatyna sáikes, partiia músheleriniń 84,2 paiyzy daýys berýge qatysty. Onyń 88 paiyzy onlain rejiminde daýys berdi. Tirkelgen 10073 kandidattyń 36 paiyzdan astamy áielder, al 29 paiyzy 35 jasqa deiingi jastar. Ishki partiialyq irikteý nátijesinde 20 myńnan astam usynys jinaldy. Onyń ishinde turǵyn úi qatynastary men turǵyn úi-kommýnaldyq sharýashylyǵy, infraqurylym men kólik, bilim berý men densaýlyq saqtaý salalaryna qatysty usynystar bar.
Nursultan Nazarbaev praimeriz sabaqtastyqty saqtai otyryp, partiia qataryn jańartýǵa múmkindik bergen naǵyz áleýmettik liftke ainalǵanyn atap ótti.
«Bul biraz adam qatysqan partiianyń aýqymdy is-sharasyna ainaldy. Biz ony alǵash ret ótkizip otyrmyz. Partiia nazar aýdarýǵa tiis kóptegen usynys pen másele kóterildi. «Nur Otan» – naqty ister partiiasy. Biz qabyldaǵan baǵdarlamalar mindetti túrde oryndalýy kerek», – dedi Elbasy.
Sonymen qatar Qazaqstannyń Tuńǵysh Prezidenti partiianyń sailaýaldy baǵdarlamasynyń jobasyna jeke toqtaldy.
«Saiasi keńestiń Biýrosynda respýblikalyq sailaýaldy baǵdarlamanyń jobasyn talqylaǵan edik. Qazirgi kúrdeli ahýal eskerile otyryp, baǵdarlamada bizdiń maqsattar ben aýqymdy mindetter bekitildi. Bul jumysqa partiianyń barlyq músheleri jumyldyrylady. Sebebi, munyń bári halyqtyń ál-aýqatyn jaqsartýǵa baǵyttalyp otyr. Bizdiń sailaý aldyndaǵy ýádelerimizdiń bárin oryndaý úshin jan-jaqty qamdaný kerek», – dedi partiia Tóraǵasy.
Kezdesý barysynda Elbasy partiiaǵa «Birgemiz» qorymen birlesip, búkil el boiynsha taǵy 100 myń áleýmettik az qamtylǵan otbasyǵa 50 myń teńge kóleminde qosymsha tólemder uiymdastyrýdy tapsyrdy.
– Partiianyń ortalyq apparaty men bizdiń aktiv aýqymdy jumys istedi. Men olarǵa qajyrly eńbegi úshin alǵysymdy bildiremin. Alda áli atqaratyn sharýa kóp. El igiligine baǵyttalǵan jumysty jalǵastyrýymyz kerek, – dedi Qazaqstannyń Tuńǵysh Prezidenti.
