Reseilik oppozitsiialyq saiasatker Aleksei Navalnyi Vladimir oblysyndaǵy túrme aýrýhanasynan Pokrov qalasyndaǵy koloniiaǵa aýystyryldy.
Bul týraly dúisenbi kúni Navalnyidyń túrme ákimshiligi ústinen túsirgen shaǵymy boiynsha ótken sot tyńdaýynda belgili boldy. Aqpan aiynda sot úkimi shyqqannan keiin saiasatker osy Pokrov abaqtysyna jiberilgen edi.
Navalnyi eki aptadan astam ýaqytqa sozylǵan ashtyq aktsiiasynan keiin iaǵni, 18 sáýirde Vladimir oblysyndaǵy túrme aýrýhanasyna jatqyzylǵan. Aýrýhanada oppozitsionerdi azamattyq dárigerler qarady, tek osydan soń ol ashtyq aktsiiasyn toqtatqan.
Dúisenbi kúni sot otyrysy kezinde Navalnyi keletin basylymdarǵa bailanysty túrme ákimshiligi ústinen jazǵan shaǵymynan bas tartty. Oppozitsionerdiń aitýynsha, koloniia keibir kezde basylymdardaǵy keibir maqalalardy qiyp otyrǵan. Al túrme basshylyǵy ony joqqa shyǵarǵan. "Men shaǵymymdy qaitaryp alǵym keledi, sebebi biz qazir zańdyq turǵyda eshqandai tsenzýra joq ekeni anyqtalǵan sátte turmyz" dedi.
Oppozitsioner sonymen birge Quran bermegeni úshin túrme ákimshiliginiń ústinen túsirgen shaǵymdy qaitarýdy surady. "Qazir mende Quran da bar, Vladimir Sorokinniń sońǵy kitaby da bar, tipti Bibliia da bar. Másele bir izge tústi. Munda maǵan kitapty bergeni jáne osy tájiribeni júielegenimiz mańyzdy" dedi ol. Sot eki isti toqtatýǵa kelisti.
2 aqpanda Máskeýdiń Simonov soty Aleksei Navalnyidy 2013 jylǵy "Iv Roshe" isi boiynsha shartty jaza erejelerin oryndamady dep tanyp, shartty jazany túrmemen aýystyrǵan. Eýropanyń adam quqyǵy jónindegi soty istiń saiasilanǵanyn aitqan. Oppozitsioner túrmede 2,5 jyl otyrýy tiis.
