Reseide oppozitsiialyq saiasatker Aleksei Navalnyi men ózge "saiasi tutqyndardy" qoldap, áleýmettik jelide video jariialaǵan politsiia qyzmetkeri jumystan qýyldy.
Máskeýdiń ońtústik-batysynan 460 shaqyrym jerdegi Kýrsk qalasynyń politsiiasynda istegen Rýslan Agibalov 22 qańtarda Youtube jelisinde video jariialaǵannan soń bir saǵat ótpei jatyp "abyroisyz qylyǵy úshin" jumystan shyǵarylǵan.
Shamamen 30 myń ret kórilgen videoda Agibalov elde bilikti synaǵandardyń qatań qýdalanyp jatqanyn alǵa tartyp, balalarynyń bolashaǵyna alańdaitynyn jetkizgen.
"Men sonymen birge balalarym ósken kezde "áke, bizdiń erkin ári aýqatty elde ómir súrýimiz úshin ne istediń?" dep suraǵan kezde jaýap taba almai, qinalǵym kelmeidi" degen.
Politsiia qyzmetkeri buǵan qosa video jariialaýyna túrli qylmystyq ister atap aitqanda, Habarovskiniń burynǵy gýbernatory Sergei Fýrgaldyń qamalýy jáne prezident Vladimir Pýtinniń synshylarynyń "jumbaq ólimin" (tanymal hip-hop ánshisi Kirill Detsl Tomatskii jáne tanymal júrgizýshi Sergei Dorenkonyń qazasy) saraptaý túrtki bolǵanyn aitqan.
Byltyr Fýrgal ustalǵannan keiin Qiyr Shyǵystaǵy Habarovskide iri narazylyq tutanǵan.
23 qańtarda Reseidiń túrli qalalarynda ondaǵan myń adam Kreml synshysy Aleksei Navalnyidy bosatýdy talap etip, narazylyqqa shyqty. Baqylaýshylar ony sońǵy birneshe jyl ishindegi narazylyqtardyń eń irisi dep atady.
"Novichok" ýymen ýlanyp, aýrýhanaǵa túsken Aleksei Navalnyi Germaniiada emdelip, 17 qańtarda Reseige kelgen bette Máskeý áýejaiynda ustalǵan. Ol ózine qastandyqty bilik uiymdastyrdy dep aitqan.
