Aleksei Navalnyidyń isi boiynsha Reseige qarsy kúsheigen sanktsiialar EAEO-ǵa múshe basqa memleketterge qalai áser etýi múmkin?
Reseilik ekonomist ári saiasatker, Eýraziialyq ekonomikalyq komissiianyń integratsiianyń negizgi baǵyttary jáne makroekonomika jónindegi alqa múshesiniń mindetin atqarýshy Sergei Glazev osy suraqqa jaýap berdi, dep habarlaidy "Ult aqparat".
«Bul sanktsiialar qazirgi ýaqytta Dúniejúzilik saýda uiymynyń normalary men HVQ jarǵysyn óreskel buza otyryp, zańnamalyq sheńberden tys sipatta salynyp jatyr. Jaqynda ótken Davos forýmy iskerlik ortada jáne kóptegen elderde sanktsiialardan bas tartý jónindegi halyqaralyq deńgeidegi úlken kelisim bar ekenin kórsetti. Sanktsiialardan eshkimge paida joq. Reseige qarsy sanktsiialar Eýropalyq Odaqqa bizden de qatty ziian keltirdi dep aita alamyn. Iaǵni, sanktsiia degenińizdiń ózi - qos júzi bar qylysh», - dedi spiker.
Ol sanktsiialar jariialanǵan bes jyldyń ishinde saýdaaralyq qatynastar qurylymynda aitarlyqtai ózgerister bolǵanyn atap ótti.
«Qytaimen saýda qarqyndy túrde ósip keledi. Biz odan bólek Ońtústik-Shyǵys Aziiamen yntymaqtastyqtyń úlken múmkindikterin kórip otyrmyz. Vetnammen jáne Singapýrmen jumys isteitin erkin saýda aimaǵyn quryp jatyrmyz. Úndistanmen, Iranmen de kelissózder júrgizilýde. Shyn máninde, Amerika Qurama Shtattary sanktsiialardyń bastamashysy boldy. Al onyń álegi birinshi kezekte bizdiń Eýropalyq Odaqpen yntymaqtastyǵymyzǵa áser etedi. Biraq bul problemalar Shyǵystaǵy yntymaqtastyqtyń artýymen óteledi. Sanktsiialar búgin de álemdik ekonomikada bolyp jatqan qurylymdyq ózgeristerdi kúsheitedi. Búgingi tańda Ońtústik-Shyǵys Aziia elderindegi ekonomikalyq belsendiliktiń jiyntyq kólemi óndiris pen saýda turǵysynan alǵanda AQSh pen Eýropalyq Odaqtan asyp túsedi. Meniń oiymsha, bul sanktsiia tez arada aiaqtalady. Biz barlyq memleketpen yntymaqtastyqqa daiynbyz», - dep qosty Sergei Glazev.
Óz kezeginde Ónerkásip jáne agroónerkásip kesheni alqasynyń taǵy bir múshesi Kamalian Artak sanktsiialardyń jaǵymsyz áseri qiyn ekenin jasyrǵan joq.
«Biraq sanktsiianyń oń áseri de bar. Bul otandyq óndirýshilerdi óz ónimin shyǵarýǵa yntalandyra túsedi. Eger biz aýyl sharýashylyǵy salasyn qaraityn bolsaq, Reseide keiingi jyldary mal sharýashylyǵy turǵysynan san jaǵynan da, sapa jaǵynan da aitarlyqtai ósim bar. Árine, mundai sanktsiialar bolmasa jaqsy bolar edi, biraq eger ol bolsa, onda ekonomikanyń naqty sektorynda importty almastyrýmen ainalysý kerek», - dep qosty Artak Kamalian.
