Foto: muftyat.kz
Búgin Astana qalasynda ótken Qazaqstan musylmandarynyń H Quryltaiynda QMDB Tóraǵasy, Bas múfti laýazymyna Naýryzbai qajy Taǵanulynyń kandidatýrasy usynyldy, dep habarlaidy Ult.kz QMDB baspasóz qyzmetine silteme jasap.
Quryltaiǵa jinalǵan 300-ge jýyq delegat osy kandidatýraǵa biraýyzdan daýys berip, qoldaý kórsetip, Naýryzbai qajy Taǵanulyn Bas múfti laýazymyna qaita sailady.
- Quryltaiǵa elimizdiń ár oblysynan kelgen 300-ge jýyq delegat meniń kandidatýrama daýys berip, senim bildirip, Bas múfti laýazymyna qaita sailady. Bul senimdi abyroimen aqtaýǵa bar kúsh-jigerimdi jumsaimyn. Josparlap otyrǵan birqatar jumystarymyz bar. Máselen, aldaǵy 2025 jyly Qazaqstan musylmandary dini basqarmasynyń derbes múftiiat bolyp qurylǵanyna 35 jyl tolady. Mereitoi aiasynda jospardaǵy kóptegen igi isterdi jurt bolyp jumylyp, halyq bolyp birigip atqarýǵa barshańyzdy shaqyramyn, - dedi QMDB Tóraǵasy, Bas múfti Naýryzbai qajy Taǵanuly jýrnalisterge bergen suhbatynda.
Aita keteiik, Naýryzbai qajy Taǵanuly QMDB Tóraǵasy, Bas múfti laýazymyna ekinshi ret sailanyp otyr.
