NATO sammiti. Briýssel, 24 naýryz 2022 jyl.
NATO-ǵa múshe elderdiń basshylary beisenbi kúni Briýsseldegi sammit kezinde Ortalyq jáne Shyǵys Eýropa elderiniń qaýipsizdigin nyǵaitýǵa kelisti. Atap aitqanda, Soltústikatlantikalyq odaqqa múshe Rýmyniia, Bolgariia, Vengriia, Slovakiiaǵa NATO-nyń qosymsha áskeri toptary jiberiledi, dep habarlaidy Azattyq.
NATO bas hatshysy Iens Stoltenberg sammitten keiin baspasóz máslihatynda Soltústikatlantikalyq odaq Ýkrainaǵa qarý-jaraq jáne jabdyqtaryn jetkizip, "Kievti qoldai beredi" dedi. Ol sonymen birge Reseige "himiialyq qarý qoldanýdyń" zardabyn eskertti.
NATO jetekshileri qaqtyǵysty ýshyqtyrmas úshin Ýkrainaǵa ásker jibermeitinin qaitalady. Osy maqsatta "Ýkraina áýe keńistigin jabý" týraly sheshiminen bas tartpaitynyn da jetkizdi.
Buǵan deiin Polsha Ýkrainaǵa bitimger ásker jiberýdi usynǵan, alaida sammitte bul usynys kóp talqylanǵan joq.
"Ýkrainaǵa prezident Vladimir Zelenskii suraǵan qarý-jaraq berile me?" degen suraqqa Stoltenberg "jai-japsaryn tolyq aita almaitynyn" jetkizdi.
NATO basshylary málimdemede Reseidiń basqynshylyǵyn aiyptap, Máskeýdi Ýkraina aýmaǵynan áskerin alyp ketýge shaqyrǵan.
"Ýkrainalyqtar Reseidiń qatigez basqynshylyǵyna erlikpen tótep berip, álemdi tańǵaldyrdy" dep jazylǵan málimdemede. Onda sonymen birge Ýkrainada jasalýy yqtimal áskeri qylmys týraly da aitylǵan.
"Prezident Pýtinniń Ýkrainaǵa shabýyl jasaý týraly sheshimi – saldary aýyr strategiialyq qatelik. Resei halqy da zardabyn tartady" dedi NATO basshylary.
Ýkrainadaǵy qarýly qaqtyǵysqa bailanysty osyǵan deiin Stoltenbergtiń NATO bas hatshysy retinde ókileti bir jylǵa uzaryp, 2023 jyldyń kúzine deiin osy qyzmette qalatyny belgili bolǵan.
