NATO elderi Ýkrainaǵa qoldaý kórsetýge kelisip, sovet zamanynyń ǵana emes, sońǵy úlgidegi qarý-jaraqtardy jetkize bastady. NATO bas hatshysy Iens Stoltenberg áskeri odaq elderiniń syrtqy ister ministrleriniń kezdesýinde osylai dep málimdedi. Bul týraly Azattyq habarlaidy.
Reseidiń Ýkrainaǵa áskeri qimyl júrgizip jatqanyn eskertken Stoltenberg Kievtiń batys elderinen qarýdyń naqty qai túrlerin alǵanyn atap jatpady.
NATO elderi Grýziia, Bosniia men Gertsegovinaǵa da kómektesýge kelisti.
Atap aitqanda, Grýziia qaýipsizdik bailanysy jáne kiberqaýipsizdik salalarynda kómek alady. Bosniia men Gertsegovina eldiń qorǵanysyn nyǵaitatyn kómek paketine ie bolady.
Jetilik tobyndaǵy elder Kremlge qysymdy kúsheite túsetinin málimdedi. Olar Reseidiń memlekettik qurylymdaryna qarsy qosymsha sanktsiia jariialaýdy kózdep otyr.
- Reseidiń qarýly kúshteri 24 aqpanda prezident Vladimir Pýtinniń buiryǵymen Ýkraina aýmaǵyna basyp kirdi. Kiev Máskeýdi "azamattyq infraqurylymdardy ádeii joiyp jatyr" dep aiyptady. Resei jaǵy "áskeri nysandardy ǵana atqyladyq" dep otyr.
- Soǵys ýaqytynda kelissózder de júrip jatyr, biraq ázirge odan nátije shyqpady. Reseidiń syrtqy ister ministri Sergei Lavrov Ýkraina 29 naýryzda Stambýldaǵy júzdesýde aitylǵan talaptaryn qataita tústi dep málimdedi. Kelissózderde ýkrain jaǵy Ýkrainanyń beitarap mártebesi týraly halyqaralyq kelisim jobasyn usynyp, onyń qaýipsizdigine halyqaralyq kepil suraǵan. Atap aitqanda, mundai kepildik anneksiialanǵan Qyrymǵa, Donbastyń bir bóligine júrmeitini aitylǵan. Endi Kiev mundai erejeden bas tartyp otyr, deidi Lavrov. Ýkraina jaǵy ázirge Lavrovtyń málimdemesine jaýap bermedi. Ýkraina syrtqy ister ministri Dmitrii Kýleba bul ýaqytta Briýsselge baryp, NATO-ǵa múshe elderdiń syrtqy ister ministrlerimen, Jetilik toby elderiniń ókilderimen kezdesti.
