ناتو ەلدەرٸ ۋكرايناعا قولداۋ كٶرسەتۋگە كەلٸسٸپ, سوۆەت زامانىنىڭ عانا ەمەس, سوڭعى ٷلگٸدەگٸ قارۋ-جاراقتاردى جەتكٸزە باستادى. ناتو باس حاتشىسى يەنس ستولتەنبەرگ ەسكەري وداق ەلدەرٸنٸڭ سىرتقى ٸستەر مينيسترلەرٸنٸڭ كەزدەسۋٸندە وسىلاي دەپ مەلٸمدەدٸ. بۇل تۋرالى ازاتتىق حابارلايدى.
رەسەيدٸڭ ۋكرايناعا ەسكەري قيمىل جٷرگٸزٸپ جاتقانىن ەسكەرتكەن ستولتەنبەرگ كيەۆتٸڭ باتىس ەلدەرٸنەن قارۋدىڭ ناقتى قاي تٷرلەرٸن العانىن اتاپ جاتپادى.
ناتو ەلدەرٸ گرۋزييا, بوسنييا مەن گەرتسەگوۆيناعا دا كٶمەكتەسۋگە كەلٸستٸ.
اتاپ ايتقاندا, گرۋزييا قاۋٸپسٸزدٸك بايلانىسى جەنە كيبەرقاۋٸپسٸزدٸك سالالارىندا كٶمەك الادى. بوسنييا مەن گەرتسەگوۆينا ەلدٸڭ قورعانىسىن نىعايتاتىن كٶمەك پاكەتٸنە يە بولادى.
جەتٸلٸك توبىنداعى ەلدەر كرەملگە قىسىمدى كٷشەيتە تٷسەتٸنٸن مەلٸمدەدٸ. ولار رەسەيدٸڭ مەملەكەتتٸك قۇرىلىمدارىنا قارسى قوسىمشا سانكتسييا جارييالاۋدى كٶزدەپ وتىر.
- رەسەيدٸڭ قارۋلى كٷشتەرٸ 24 اقپاندا پرەزيدەنت ۆلاديمير پۋتيننٸڭ بۇيرىعىمەن ۋكراينا اۋماعىنا باسىپ كٸردٸ. كيەۆ مەسكەۋدٸ "ازاماتتىق ينفراقۇرىلىمداردى ەدەيٸ جويىپ جاتىر" دەپ ايىپتادى. رەسەي جاعى "ەسكەري نىسانداردى عانا اتقىلادىق" دەپ وتىر.
- سوعىس ۋاقىتىندا كەلٸسسٶزدەر دە جٷرٸپ جاتىر, بٸراق ەزٸرگە ودان نەتيجە شىقپادى. رەسەيدٸڭ سىرتقى ٸستەر مينيسترٸ سەرگەي لاۆروۆ ۋكراينا 29 ناۋرىزدا ستامبۋلداعى جٷزدەسۋدە ايتىلعان تالاپتارىن قاتايتا تٷستٸ دەپ مەلٸمدەدٸ. كەلٸسسٶزدەردە ۋكراين جاعى ۋكراينانىڭ بەيتاراپ مەرتەبەسٸ تۋرالى حالىقارالىق كەلٸسٸم جوباسىن ۇسىنىپ, ونىڭ قاۋٸپسٸزدٸگٸنە حالىقارالىق كەپٸل سۇراعان. اتاپ ايتقاندا, مۇنداي كەپٸلدٸك اننەكسييالانعان قىرىمعا, دونباستىڭ بٸر بٶلٸگٸنە جٷرمەيتٸنٸ ايتىلعان. ەندٸ كيەۆ مۇنداي ەرەجەدەن باس تارتىپ وتىر, دەيدٸ لاۆروۆ. ۋكراينا جاعى ەزٸرگە لاۆروۆتىڭ مەلٸمدەمەسٸنە جاۋاپ بەرمەدٸ. ۋكراينا سىرتقى ٸستەر مينيسترٸ دميتريي كۋلەبا بۇل ۋاقىتتا بريۋسسەلگە بارىپ, ناتو-عا مٷشە ەلدەردٸڭ سىرتقى ٸستەر مينيسترلەرٸمەن, جەتٸلٸك توبى ەلدەرٸنٸڭ ٶكٸلدەرٸمەن كەزدەستٸ.
