Qazaqstannyń makroekonomikalyq turaqtylyǵy boiynsha pozitsiia jaqsardy. Bul týraly Májilistiń jalpy otyrysynda 2019 jylǵy respýblikalyq biýdjettiń atqarylýy týraly esepti talqylaý kezinde Esep komitetiniń tóraiymy Natalia Godýnova málim etti, dep habarlaidy QazAqparat.
«Dúniejúzilik ekonomikalyq forýmnyń jahandyq básekege qabilettik reitinginde Qazaqstannyń makroekonomikalyq turaqtylyǵy boiynsha pozitsiia jaqsardy. Munaiǵa degen táýeldilikti tómendetý tendentsiiasyna qol jetkizilmedi. 10 jyl boiyna óńdeýshi sektor úlesi 11 paiyzdan aspady. Eksport qurylymynda mineraldy ónim 70 paiyzdan asty. Azamattar ál-aýqaty ósimń boiynsha maqsat qalai oryndalyp jatyr? Halyqtyń naqty tabysy 5,5 paiyzǵa ósti. Alaida, halyq shyǵystarynda azyq-túlik taýarlarynyń úlesi artty, iaǵni 50 paiyzǵa deiin. Damyǵan elderde bul kórsetkish 10 paiyz shamasynda», - dedi N. Godýnova.
Onyń sózine qaraǵanda, Resei men Belarýste osy kórsetkish azamattar shyǵystarynyń úshten bir bóliginen aspaidy.
Sonymen qatar ol memlekettik qaryzǵa qatysty pikir bildirdi.
«Memlekettik borysh, iaǵni Úkimet qaryzy sekildi qaýipsiz deńgeide. Qaryzdy jabýǵa qatysty ári osy baǵytta qyzmet kórsetý baǵytyndaǵy shyǵystar artyp keledi. Úkimettik qaryz boiynsha osyndai shyǵystar 1 trln 400 mlrd teńgege jýyqtady», - dedi ol.
Esep komitetiniń tóraiymy byltyr memlekettik-jekeshelik seriktestik, kvazimemlekettik sektor men jergilikti atqarýshy organdar jobalary boiynsha halyqaralyq qarjy uiymdarynan zaimdardy qadaǵalaý turǵysynda tiisti jumystar atqarylǵanyn jetkizdi.
