QR Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaev eńbekaqy tóleýdiń jańa júiesiniń arqasynda qyzmetshilerdiń áleýmettik-turmystyq jaǵdaiyn qalai jaqsartqany jóninde aityp berdi, dep habarlaidy "Ult aqparat".
Dostar, memlekettik qyzmettegi laiyqty eńbekaqy ańyz emes, shyndyq. Ótken jyl úshin bonýstar tóleý ýaqyty keldi.
«Ózderińiz biletindei 2018 jyldan bastap biz jańa eńbekaqy júiesin engizdik. Ol eki bólikten turady: turaqty - bul faktorlyq-baldyq shkala negizindegi jalaqy jáne ainymaly - bonýstar.
Birinshi bólim boiynsha bári túsinikti. Turaqty jalaqy belgilendi. Agenttik qyzmetkerleriniń jalaqysy eki esege artty, al júrgizilgen ońtailandyrý men ákimshilik shyǵystardy qysqartý atqarýshy quramǵa qosymsha 30% - dan 60% - ǵa deiin ústeme tóleýge múmkindik berdi», dep jazdy Alik Shpekbaev Facebook-tegi paraqshasynda.
Onyń aitýynsha, bonýstar qyzmetshilerdiń jumysynyń jyl boiǵy tiimdiligi men nátijeliligine qarai eskerilgen. Ol agenttik merekelik syiaqylardan bas tartyp, sol arqyly bárin teńestirýden «ketip», al ár qyzmetkerdiń qyzmeti jeke baǵalanatynyn atap ótti.
Alik Shpekbaev jańa júieniń nátijelerimen bólisti.
«Agenttikte «úzdikter» de, sondai-aq «ortashalar» da bar. Olardyń bonýstarynyń mólsheri osyǵan bailanysty. Qanaǵattanarlyqsyz jumys istegen «tómen baǵa alǵandarǵa» ol múldem berilmeidi. Eger olar qyzmetke degen qarym-qatynasyn ózgertpese kelesi baǵalaýdyń nátijesi boiynsha jumystan shyǵarylady. Eńbekaqy tóleýdiń jańa júiesiniń arqasynda áriptesterimiz áleýmettik-turmystyq jaǵdailaryn edáýir jaqsartyp jatqany qýantady. Bireýleri kópten kútken turǵyn úi úshin bastapqy jarnany tólei aldy, basqalary mashinaǵa nesie resimdedi,úshinshileri ipotekany jáne tutynýshylyq qaryzdaryn merziminen buryn ótedi.
Al bireýlerge jalaqysy ósken soń balalarynyń jeke kýrstary men shyǵarmashylyq úiirmeleriniń aqysyn tóleýge múmkindik aldy», - dedi A.Shpekbaev.
Agenttik tóraǵasy osyǵan qatysty naqty mysaldar keltirdi. «Qýandyq Aitaqyn - jas jigit, buryn qurylys gipermarketinde jumys istegen. Konkýrs boiynsha memlekettik qyzmetke kelip, úsh jyl ishinde sarapshydan Memlekettik qyzmet departamentiniń bas konsýltantyna deiin ósti. Joǵary jalaqy men bonýstardan túsken jinaq esebinen ol 20% mólsherinde bastapqy jarnany engize otyryp páterdi Turǵyn úi qurylys jinaq banki arqyly resimdei aldy.
Gúlnur Jaraspaeva - Strategiialyq ázirlemeler jáne Halyqaralyq baǵdarlamalar departamentiniń qyzmetkeri. Eki uldyń anasy. Onyń qamqorlyǵynda taǵy eki bala bar. Bonýstar oǵan balalardyń sapaly damýynda eleýli demeý bolady.
Qaiyrjan Sultanǵaziev - bizdiń Aqmola oblysyndaǵy departamenttiń qyzmetkeri. Jalaqyny kóterý qarajatty jinaqtaýǵa múmkindik berdi. Úzdik qyzmetker bolǵandyqtan jaqsy bonýstar aldy. Nátijesinde 20% -yn tólep, salonnan nesiege jańa avtokólik satyp aldy», - dep jazdy Alik Shpekbaev.
Onyń aitýynsha, bul mysaldar memlekettik qyzmette ádil jáne adal jumys istei otyryp, óz otbasynyń ál-aýqatyn jaqsartýǵa bolatynyn dáleldeidi.
Ol ilki joba jyl sońyna deiin jalǵasatynyn atap ótti. Taiaýda jobaǵa qatysatyn 3 memlekettik organda bonýs tólenedi dep kútilýde.
