QR Eńbek jáne halyqty áleýmettik qorǵaý vitse-ministri laýazymynan bosatylǵan Nariman Muqyshev jańa qyzmeti týraly aitty, dep habarlaidy QazAqparat.
«Endi qaida jumys isteitinim týraly kóptegen suraqtar túsýde. BI Group Holdinginiń jáne CEO BI Innovations-tiń IT jónindegi Basqarýshy direktory retinde jumysqa kiristim. Kompaniiada joba óte kóp, sonyń ishinde tsifrlyq. Meniń negizgi mindetim - BI Group-tiń qurylys boiynsha ǵana emes, sondai-aq tsifrlyq alpaýyt bolýyna qol jetkizý. Ór maqsattar men josparlar óte kóp! Eger sizde qyzyqty usynystar men ideialar bolsa, qarastyrýǵa ázirmin. Burynǵydai barlyq áleýmettik jelide konstrýktivti áńgime úshin ashyqpyn», - dep jazdy N.Muqyshev Telegram-da.
Eske salaiyq, 7 shilde kúni Nariman Muqyshev QR Eńbek jáne halyqty áleýmettik qorǵaý vitse-ministri laýazymynan bosatyldy.
Nariman Nurlanuly Muqyshev 1984 jyly 9 mamyrda Qaraǵandy oblysynda dúniege kelgen. Súleimen Demirel atyndaǵy ýniversitetti, Halyqaralyq biznes akademiiasyn támamdaǵan.
Eńbek jolyn 2006 jyly bastaǵan. Ár jyldary kommertsiialyq qurylymdarda jumys istegen. 2014 jylǵy qarasha aiynan bastap 2018 jylǵy maýsym aiyna deiin «Qazposhta» AQ basqarýshy direktory qyzmetin atqardy.
2018 jylǵy maýsym aiynan 2020 jyldyń 7 shildesine deiin QR Eńbek jáne halyqty áleýmettik qorǵaý vitse-ministri boldy.
