Eńbek jáne halyqty áleýmettik qorǵaý vitse-ministri Nariman Muqyshev 42 500 teńge áleýmettik tólemge qatysty áleýmettik jelilerde atyna túsken saýaldardyń barlyǵyna birdei nelikten jaýap bere almaityndyǵyn túsindirdi, dep habarlaidy QazAqparat.
«Maǵan ashý-yzamen nege jaýap bermeisiń dep jazyp jatady. Osyny túsindirgim keledi. Men basqa máselege (tsifrlandyrý) jetekshilik jasasam da 42 500 teńgege qatysty óte kóp suraq túsedi. Olardy sheshý qajettigin túsingendikten jaýaptaryn beiindi bólimshelerden surap, odan keiin jiberemin. Instagram-da táýligine 500, al Facebook-te 200-300 habarlama alamyn. Bul jazbanyń astyna qaldyrylatyn shamamen 1-2 myń pikirdi qospaǵanda. Onyń barlyǵyna jaýap berý múmkin emes. Kúndelikti múmkindigimshe jaýap beremin. Biraq, suraqtar áldeqaida kóp túsetindikten úlgermeimin. Sondyqtan áli jaýap bermegenderim túsinistik tanytsa eken», - dep jazdy vitse-ministr Instagram paraqshasynda.
Onyń atap ótýinshe, jazbalaryna qaldyrylǵan saýaldarǵa Eńbek ministrligindegi áriptesterine jaýap berýdi ótingen. Al ózi jeke kelgen saýaldarǵa jaýap berýge tyrysyp keledi.
«Biraq, kóptegen suraqtar qaitalanady. Barlyǵy da olardyń jaǵdailaryn jeke alyp qarastyrýdy talap etedi. Eger árbir jaǵdaidy jeke alyp qarasam, onda maǵan júieli máselelerdi sheshýmen múldem ainalyspaýǵa týra keletindigin túsinýlerińizdi ótinemin. Sol sebepti saýaldardyń basym bóligin qamtityn jazba jazyp júrmin. Saýal qoimastan buryn olardy oqyp alýlaryńyzdy ótinemin», - dedi Nariman Muqyshev.
Sonymen qatar 42500@enbek.kz jáne 42500@gfss.kz elektrondy poshtalaryna da táýlik boiy birneshe myń saýal túsetindigin jáne ondaǵan maman únemi olarǵa jaýap berýge tyrysatyndyǵyn atap ótedi.
