Qazaqstan Respýblikasy Úkimeti alańynda ótken baspasóz konferentsiiasy barysynda QR aýyl sharýashylyǵy ministri Saparhan Omarov astyq naryǵyndaǵy ahýal men nan baǵasy týraly aityp berdi, dep habarlaidy "Ult aqparat".
Onyń aitýynsha, nan baǵasy turaqty bolyp qalady, baǵanyń aitarlyqtai aýytqý jaǵdailary kútilmeidi.
«Jyl basynda men nan baǵasynyń ósýin tejeý týraly aittym. Azyq-túlik korporatsiiasy arzandatylǵan astyqty naýbaihanalarǵa 100-den 150 myń tonnaǵa deiin satady. Biz 100 myń tonna astyq sattyq. Sodan beri nan baǵasy turaqty», — dedi S. Omarov.
Sonymen birge, aýyl sharýashylyǵy ministri aýa-raiy jaǵdailaryna bailanysty biyl 1-1,5 tonnaǵa az ónim jinaý boljalǵanyn atap ótti. Bul jaǵdai ishki naryqqa áser etpeidi.
«Eger biz 19 mln tonna astyq jinasaq, onyń 9 milliony ishki naryqta qalady, biz 7-8 million tonnasyn eksporttaimyz, 2 million tonna astyq qalady. Sonymen qatar, bizde byltyrǵydan qalǵan astyq bar. Onyń kólemi – 1,5 million tonnany quraidy. Jalpy, bizde ishki naryqty qamtamasyz etý úshin astyq jetkilikti», — dedi ministr.
Sonymen qatar, S. Omarov atap ótkendei, Azyq-túlik kelisimshart korporatsiiasy satyp alatyn 1 million tonna astyqtyń ishinde nan óndirýshiler úshin 150 myń tonna kóleminde, qus fabrikalarv úshin 100 myń tonna kóleminde rezerv bar.
