Foto: primeminister.kz
Premer-Ministr Álihan Smaiylov Ortalyq memlekettik jáne jergilikti atqarýshy organdardyń ózara is-qimyly jónindegi úilestirý shtabyn ótkizdi, dep habarlaidy "Ult aqparat" primeminister.kz saityna silteme jasap.
Úkimet basshysy problemalyq máselelerdi jedel sheshý úshin ministrlikter, ákimdikter men ulttyq kompaniialar arasyndaǵy úilestirýdi kúsheitýdiń mańyzyn atap ótti. Osy oraida Premer-Ministr ákimdikter jergilikti jerlerdegi problemalar týraly Úkimetke tolyq aqparat bere bermeitinin atap ótti.
«Máselen, jylytý maýsymyna nemese sý tasqynyna daiyndyq kezinde, infraqurylymdy jańǵyrtý jáne jóndeý boiynsha málimetter ýaqytyly jáne tolyq berilmeidi. Nátijesinde problemalar durys sheshilmeidi. Bul tótenshe jaǵdailarǵa alyp keledi. Ótken qys aiy men kóktemde ondaidyń birazyn kórdik. Naqty is júzindegi nátijeler qajet. Sonda ǵana azamattar jaǵdaidyń ózgergenin, ómir súrý sapasynyń jaqsarǵanyn sezinetin bolady. Árbir memlekettik organ men ákimdik, ulttyq kompaniialar jaǵdaidy jiti baqylap, buqaralyq aqparat quraldary men áleýmettik jelilerge monitoring júrgizýi tiis», — dedi Premer-Ministr.
Sonymen qatar Úkimet basshysy belsendi túrde túsindirý jumystaryn júrgizip, aldyn alý sharalaryn qabyldap, máselelerdi ýaqytyly sheshý qttigin aitty.
Premer-Ministrdiń orynbasary – Úkimet Apparatynyń basshysy Ǵalymjan Qoishybaev óz sózinde kún saiyn halyqtyń jariialanymdary, shaǵymdary men ótinishteriniń daidjesti jasalatynyn, al asa ózekti máseleler jedel jáne proaktivti túrde sheshý úshin Táýekelder kartasyna engiziletinin atap ótti.
Oǵan qosa Úkimet Apparaty azamattardan kelip túsken ótinishterge taldaý júrgizedi. Bul rette ótinishterdiń qaralýyn baqylaý kúsheitildi.
Premer-Ministr Úilestirý shtabynyń otyrystarynda óńirler men ortalyq memlekettik organdardyń ózara is-qimylyn talap etetin máseleler únemi kóterilip otyratynyn atap ótti. Sonymen qatar Premer-Ministrdiń orynbasarlary kóteriletin máselelerdi apta saiyn óz deńgeiinde qaraityn bolady.
«Úkimet Apparaty Memleket basshysy men Úkimet basshylyǵynyń tapsyrmalarynyń oryndalý barysyn qatań baqylaýǵa alýy tiis. Bizge ózara kelisilgen is-áreketter men naqty nátije kerek», — dep túiindedi Álihan Smaiylov.
