فوتو: primeminister.kz
پرەمەر-مينيستر ەليحان سمايىلوۆ ورتالىق مەملەكەتتٸك جەنە جەرگٸلٸكتٸ اتقارۋشى ورگانداردىڭ ٶزارا ٸس-قيمىلى جٶنٸندەگٸ ٷيلەستٸرۋ شتابىن ٶتكٸزدٸ, دەپ حابارلايدى "ۇلت اقپارات" primeminister.kz سايتىنا سٸلتەمە جاساپ.
ٷكٸمەت باسشىسى پروبلەمالىق مەسەلەلەردٸ جەدەل شەشۋ ٷشٸن مينيسترلٸكتەر, ەكٸمدٸكتەر مەن ۇلتتىق كومپانييالار اراسىنداعى ٷيلەستٸرۋدٸ كٷشەيتۋدٸڭ ماڭىزىن اتاپ ٶتتٸ. وسى ورايدا پرەمەر-مينيستر ەكٸمدٸكتەر جەرگٸلٸكتٸ جەرلەردەگٸ پروبلەمالار تۋرالى ٷكٸمەتكە تولىق اقپارات بەرە بەرمەيتٸنٸن اتاپ ٶتتٸ.
«مەسەلەن, جىلىتۋ ماۋسىمىنا نەمەسە سۋ تاسقىنىنا دايىندىق كەزٸندە, ينفراقۇرىلىمدى جاڭعىرتۋ جەنە جٶندەۋ بويىنشا مەلٸمەتتەر ۋاقىتىلى جەنە تولىق بەرٸلمەيدٸ. نەتيجەسٸندە پروبلەمالار دۇرىس شەشٸلمەيدٸ. بۇل تٶتەنشە جاعدايلارعا الىپ كەلەدٸ. ٶتكەن قىس ايى مەن كٶكتەمدە وندايدىڭ بٸرازىن كٶردٸك. ناقتى ٸس جٷزٸندەگٸ نەتيجەلەر قاجەت. سوندا عانا ازاماتتار جاعدايدىڭ ٶزگەرگەنٸن, ٶمٸر سٷرۋ ساپاسىنىڭ جاقسارعانىن سەزٸنەتٸن بولادى. ەربٸر مەملەكەتتٸك ورگان مەن ەكٸمدٸك, ۇلتتىق كومپانييالار جاعدايدى جٸتٸ باقىلاپ, بۇقارالىق اقپارات قۇرالدارى مەن ەلەۋمەتتٸك جەلٸلەرگە مونيتورينگ جٷرگٸزۋٸ تيٸس», — دەدٸ پرەمەر-مينيستر.
سونىمەن قاتار ٷكٸمەت باسشىسى بەلسەندٸ تٷردە تٷسٸندٸرۋ جۇمىستارىن جٷرگٸزٸپ, الدىن الۋ شارالارىن قابىلداپ, مەسەلەلەردٸ ۋاقىتىلى شەشۋ قتتٸگٸن ايتتى.
پرەمەر-مينيستردٸڭ ورىنباسارى – ٷكٸمەت اپپاراتىنىڭ باسشىسى عالىمجان قويشىباەۆ ٶز سٶزٸندە كٷن سايىن حالىقتىڭ جارييالانىمدارى, شاعىمدارى مەن ٶتٸنٸشتەرٸنٸڭ دايدجەستٸ جاسالاتىنىن, ال اسا ٶزەكتٸ مەسەلەلەر جەدەل جەنە پرواكتيۆتٸ تٷردە شەشۋ ٷشٸن تەۋەكەلدەر كارتاسىنا ەنگٸزٸلەتٸنٸن اتاپ ٶتتٸ.
وعان قوسا ٷكٸمەت اپپاراتى ازاماتتاردان كەلٸپ تٷسكەن ٶتٸنٸشتەرگە تالداۋ جٷرگٸزەدٸ. بۇل رەتتە ٶتٸنٸشتەردٸڭ قارالۋىن باقىلاۋ كٷشەيتٸلدٸ.
پرەمەر-مينيستر ٷيلەستٸرۋ شتابىنىڭ وتىرىستارىندا ٶڭٸرلەر مەن ورتالىق مەملەكەتتٸك ورگانداردىڭ ٶزارا ٸس-قيمىلىن تالاپ ەتەتٸن مەسەلەلەر ٷنەمٸ كٶتەرٸلٸپ وتىراتىنىن اتاپ ٶتتٸ. سونىمەن قاتار پرەمەر-مينيستردٸڭ ورىنباسارلارى كٶتەرٸلەتٸن مەسەلەلەردٸ اپتا سايىن ٶز دەڭگەيٸندە قارايتىن بولادى.
«ٷكٸمەت اپپاراتى مەملەكەت باسشىسى مەن ٷكٸمەت باسشىلىعىنىڭ تاپسىرمالارىنىڭ ورىندالۋ بارىسىن قاتاڭ باقىلاۋعا الۋى تيٸس. بٸزگە ٶزارا كەلٸسٸلگەن ٸس-ەرەكەتتەر مەن ناقتى نەتيجە كەرەك», — دەپ تٷيٸندەدٸ ەليحان سمايىلوۆ.
