Memleket basshysy Qasym-Jomart Toqaev qańtar oqiǵasyna qatysty tóńkeris pe, joq álde bilikke qarsy beibit sherý me degen saýalǵan qatysty túsinik berdi, dep habarlaidy QazAqparat.
«Bul oqiǵany el ishinde ártúrli atap júrgenin bilemin. Qalai bolǵanda da biz qaraly, qasiretti kúnderdi bastan ótkerdik. Ony moiyndaýymyz kerek. Táýelsizdiktiń 30 jyly ishinde kóptegen synaqqa tap boldyq, onyń bárin el bolyp eńserdik. Biraq, dál osyndai qaraqshylardyń qatigez áreketin kórgen joqpyz. Eline, jerine adal qyzmet etetin, naǵyz otanshyl azamattar mundai opasyzdyqqa barmaidy. Bul – anyq nárse», - dedi Qasym-Jomart Toqaev Qazaqstan ulttyq telearnasyna bergen suhbatynda.
Sondai-aq, Prezident qańtar oqiǵasyna tóńkeris dep óz baǵasyn berdi.
«Ashyǵyn aitý kerek, jaǵdaidy ózderiniń jeke múddesine paidalanǵysy kelgen adamdar tóńkeris jasaýǵa talpyndy. Frantsýz tilinde osyndai áreketti coup d’etat dep aitady. Bul – tóńkeris degen sóz. Eldigimizge, memlekettik tutastyǵymyzǵa, halqymyzdyń qaýipsizdigine qarsy jasalǵan áreket boldy. Árine, halyqqa áli de kóp nárse túsiniksiz. Qarapaiym azamattar ózderiniń súiikti qalasyn óz qolymen qiratpaityny belgili. Qaraqshylar, lańkester Almatyǵa syrttan keldi. Maqsat - kisi óltirý, qorqytý, dúkenderdi tonaý, áielderdi zorlaý, aqyr sońynda bilikti qulatý», - deidi ol.
