Reseilik oppozitsiialyq saiasatker Aleksei Navalnyi Vladimir oblysy Pokrov eldi mekenindegi IK-2 koloniiasynda otyr. Bul týraly saiasatkerdiń Instagram men Feisbýktegi paraqshasynda jazba jariialandy.
"Qatań baqylaýdaǵy A sektorynan" bárińe sálem. Reseidiń túrme júiesi meni tańdandyrdy. Máskeýden nebári 100 shaqyrym jerde naǵyz kontslager jasaýǵa bolady degen nárse úsh uiyqtasam da, túsime kirmepti" dep jazdy Navalnyi.
Jazbamen birge shashy tyqyrlap alynǵan Navalnyidyń sýreti de jariialanǵan, biraq bul sýret on jyl buryn túsirilgen.
Resei biliginiń synshysy jazbada túrmede qalai jazasyn ótep jatqanyn baiandaǵan. Navalnyidyń sózine qaraǵanda, túrme ákimshiligi rejimniń saqtalýyn qatań qadaǵalaidy.
- Osy ýaqyt aralyǵynda oǵan kúsh qoldanylmaǵan jáne qoqan-loqy kórsetilmegen. "Osynshalyqty dárejede sypaiy, belgili bir maǵynada iltipat kórsetken mundai oryndy buryn-sońdy kórmeppin". "Men ony bizdiń "dostyq niettegi kontslagerimiz" dep ataimyn" dep jazdy.
- Navalnyidyń jazýynsha, túrme ákimshiligi kún tártibiniń qatań saqtalǵanyn qalaidy: "Balaǵat sózder aitýǵa tyiym salynǵan jáne ol ereje qatań saqtalady. Balaǵat joq túrmeni elestete alasyz ba? Qorqynyshty jait".
- Barlyq jerge videokameralar ornatylǵan, bárin baqylaidy jáne sál qit etse, raport jazady.
Navalnyi ózin bul koloniiaǵa qashan aýystyrǵanyn jazbaǵan.
Aleksei Navalnyi qańtar aiynda ustalǵannan keiin Máskeýdegi "Matrosskaia tishina" izoliatoryna jiberilgen edi. 25 aqpanda Vladimir oblysy Kolchýgino qalasyndaǵy tergeý izoliatoryna aýystyrylǵan bolatyn. 12 naýryzda Navalnyidy ol jaqtan alyp ketken, biraq qaida jiberilgeni aitylmaǵan edi.
IK-2 – Reseidegi rejimi eń qatań túzetý mekemeleriniń biri. Onda sottalýshylar FSIN-niń nusqaýlarynyń bárin – "núktesine deiin" oryndaýǵa mindettelgen.
Saiasatker túrmede keminde 2023 jylǵa deiin bolady.
