Foto: Gov.kz
Elordada bir mezette úsh myńnan asa dombyrashy «Balbyraýyn» kúiin oryndap, óner álemindegi bul erekshe jarqyn oqiǵa Qazaqstannyń Ginnes rekordtaryn tirkeý kitabyna endi, dep habarlaidy Ult.kz Astana ákimdiginiń resmi saityna silteme jasap.
«Qazaqstan» jeńil atletikalyq sport kesheninde «Naǵyz qazaq qazaq emes, naǵyz qazaq – dombyra» atty aýqymdy is-sharada úsh myńnan astam astanalyq dombyra úiirmelerine qatysýshylar Qurmanǵazy Saǵyrbaiulynyń shoqtyǵy biik «Balbyraýyn» kúiin bir mezgilde kúmbirletti.
«Qazaqstanda memlekettik shyǵarmashylyq tapsyrys jobasy 2021 jyldan bastap iske asyrylýda. Onyń maqsaty – 4 pen 17 jas aralyǵyndaǵy balalar men jasópirimderdi tegin úiirmelermen qamtý, olardyń bos ýaqytyn tiimdi ótkizip, ónerge degen qyzyǵýshylyǵyn arttyrý. Mine, búgin Astana qalasynda osyndai dombyra úiirmesine qatysatyn úsh myńnan asa oqýshyny jinap, bir mezette kúi oryndatyp, elimizdiń rekordtar kitabyna enýdi maqsat tuttyq. Ádette kúi úiirmesine qatysýshylar áýeli «Balbyraýyn» kúiinen bastap úirenedi ǵoi, sondyqtan kúi atasynyń osy daýylpaz kúii tańdaldy. Sonymen qatar úiirmege qatysýshylardyń ónerin baǵalamaqpyz. Mundai aýqymdaǵy is-shara elimizde alǵash ret uiymdastyrylyp otyr», - dedi Astana qalasy boiynsha memlekettik shyǵarmashylyq tapsyrysty iske asyrý mekemesiniń basshysy Erlan Jalǵas.
Foto: Gov.kz
«Buǵan deiin eshqashan bir zalda 3200-den astam mýzykant kúi nemese basqa mýzykalyq shyǵarma oryndap kórgen joq. Bul jóninde osy is-shara osyǵan deiingi elimizde ornatylǵan rekordtardy basyp ozyp otyr. Álem boiynsha da eń úlken mýzykalyq rekordtardyń biri bolǵaly otyr deýimizge bolady. Dese de bizdiń negizgi maqsatymyz – el aimaǵy boiynsha Qazaqstan rekordtar kitabyna tirkeý. Al bul maqsatymyzǵa búgin tolyq jettik dep aita alamyz. Osy protsesti arnaiy sarapshylarymyz baqylap otyrdy. Balalardyń sanyn 8 sarapshy, al kúidiń oryndalý sapasyn 4 sarapshy saralady», - dedi Qazaqstan Ginnes rekordtar kitabynyń resmi ókili Qýandyq Qudaibergenov.
Foto: Gov.kz
Kúi merekesine mádeniet qairatkeri Sholpan Qorǵanbek dirijerlik etti.
Uiymdastyrýshylardyń aitýynsha, aldaǵy ýaqytta da úiirmelerdiń qatysýymen osyndai is-sharalar jii ótkiziledi.
