فوتو: Gov.kz
ەلوردادا بٸر مەزەتتە ٷش مىڭنان اسا دومبىراشى «بالبىراۋىن» كٷيٸن ورىنداپ, ٶنەر ەلەمٸندەگٸ بۇل ەرەكشە جارقىن وقيعا قازاقستاننىڭ گيننەس رەكوردتارىن تٸركەۋ كٸتابىنا ەندٸ, دەپ حابارلايدى Ult.kz استانا ەكٸمدٸگٸنٸڭ رەسمي سايتىنا سٸلتەمە جاساپ.
«Qazaqstan» جەڭٸل اتلەتيكالىق سپورت كەشەنٸندە «ناعىز قازاق قازاق ەمەس, ناعىز قازاق – دومبىرا» اتتى اۋقىمدى ٸس-شارادا ٷش مىڭنان استام استانالىق دومبىرا ٷيٸرمەلەرٸنە قاتىسۋشىلار قۇرمانعازى ساعىربايۇلىنىڭ شوقتىعى بيٸك «بالبىراۋىن» كٷيٸن بٸر مەزگٸلدە كٷمبٸرلەتتٸ.
«قازاقستاندا مەملەكەتتٸك شىعارماشىلىق تاپسىرىس جوباسى 2021 جىلدان باستاپ ٸسكە اسىرىلۋدا. ونىڭ ماقساتى – 4 پەن 17 جاس ارالىعىنداعى بالالار مەن جاسٶپٸرٸمدەردٸ تەگٸن ٷيٸرمەلەرمەن قامتۋ, ولاردىڭ بوس ۋاقىتىن تيٸمدٸ ٶتكٸزٸپ, ٶنەرگە دەگەن قىزىعۋشىلىعىن ارتتىرۋ. مٸنە, بٷگٸن استانا قالاسىندا وسىنداي دومبىرا ٷيٸرمەسٸنە قاتىساتىن ٷش مىڭنان اسا وقۋشىنى جيناپ, بٸر مەزەتتە كٷي ورىنداتىپ, ەلٸمٸزدٸڭ رەكوردتار كٸتابىنا ەنۋدٸ ماقسات تۇتتىق. ەدەتتە كٷي ٷيٸرمەسٸنە قاتىسۋشىلار ەۋەلٸ «بالبىراۋىن» كٷيٸنەن باستاپ ٷيرەنەدٸ عوي, سوندىقتان كٷي اتاسىنىڭ وسى داۋىلپاز كٷيٸ تاڭدالدى. سونىمەن قاتار ٷيٸرمەگە قاتىسۋشىلاردىڭ ٶنەرٸن باعالاماقپىز. مۇنداي اۋقىمداعى ٸس-شارا ەلٸمٸزدە العاش رەت ۇيىمداستىرىلىپ وتىر», - دەدٸ استانا قالاسى بويىنشا مەملەكەتتٸك شىعارماشىلىق تاپسىرىستى ٸسكە اسىرۋ مەكەمەسٸنٸڭ باسشىسى ەرلان جالعاس.
فوتو: Gov.kz
«بۇعان دەيٸن ەشقاشان بٸر زالدا 3200-دەن استام مۋزىكانت كٷي نەمەسە باسقا مۋزىكالىق شىعارما ورىنداپ كٶرگەن جوق. بۇل جٶنٸندە وسى ٸس-شارا وسىعان دەيٸنگٸ ەلٸمٸزدە ورناتىلعان رەكوردتاردى باسىپ وزىپ وتىر. ەلەم بويىنشا دا ەڭ ٷلكەن مۋزىكالىق رەكوردتاردىڭ بٸرٸ بولعالى وتىر دەۋٸمٸزگە بولادى. دەسە دە بٸزدٸڭ نەگٸزگٸ ماقساتىمىز – ەل ايماعى بويىنشا قازاقستان رەكوردتار كٸتابىنا تٸركەۋ. ال بۇل ماقساتىمىزعا بٷگٸن تولىق جەتتٸك دەپ ايتا الامىز. وسى پروتسەستٸ ارنايى ساراپشىلارىمىز باقىلاپ وتىردى. بالالاردىڭ سانىن 8 ساراپشى, ال كٷيدٸڭ ورىندالۋ ساپاسىن 4 ساراپشى سارالادى», - دەدٸ قازاقستان گيننەس رەكوردتار كٸتابىنىڭ رەسمي ٶكٸلٸ قۋاندىق قۇدايبەرگەنوۆ.
فوتو: Gov.kz
كٷي مەرەكەسٸنە مەدەنيەت قايراتكەرٸ شولپان قورعانبەك ديريجەرلٸك ەتتٸ.
ۇيىمداستىرۋشىلاردىڭ ايتۋىنشا, الداعى ۋاقىتتا دا ٷيٸرمەلەردٸڭ قاتىسۋىمەن وسىنداي ٸس-شارالار جيٸ ٶتكٸزٸلەدٸ.
