Álemdik damýda kósh sońynda qalmaimyz desek, eń aldymen, ǵylymdy damytýymyz kerek. Bul týraly Memleket basshysy Qasym-Jomart Toqaev Almaty jurtshylyǵymen kezdesýinde aitty, dep habarlaidy "Ult aqparat".
«Almaty – ǵylym men bilimniń ordasy. Otandyq ǵylymdy damytý máselesi – únemi meniń jeke nazarymda. Bul salanyń elimiz úshin airyqsha máni bar. Sebebi, ǵylymnyń búgingi damýy – eldiń erteńgi tabysynyń kepili. Ókinishke qarai, bizde ǵylymdy basqarý isi jolǵa qoiylmaǵan. Men bul týraly Ulttyq akademiianyń 75 jyldyǵyna arnalǵan jiynda aittym.
Búginde otandyq ǵylymda jas ǵalymdardyń sany kóp emes. Damýǵa serpin beretin áleýetti ǵylymi institýttar da óte az. Eger álemdik damýda kósh sońynda qalmaimyz desek, eń aldymen, ǵylymdy damytýymyz kerek. Sondyqtan, ulttyq ǵylymdy jańa deńgeige kóteretin mezgil jetti. Jasyratyny joq, qazir ǵylymi ataǵy bar, biraq ilim-bilimge múlde qatysy joq adamdar kóbeiip ketti. Elimizge ómir jolyn ǵylymǵa arnaǵan, naqty ǵylymi jetistigi bar adamdar kerek.
Otandyq ǵalymdar quramyn jańartý qajet. Bul – ýaqyt talaby. Naǵyz ǵylymǵa múldem qatysy joq adamdardan arylýymyz qajet. Olardan eshqandai paida joq, ǵylymǵa keri áseri tiedi» - dedi Prezident.
Onyń sózinshe, Ǵylym akademiiasyna ǵylymǵa jany ashityn, ǵylymi áleýeti zor azamattardy ǵana kóptep tartý qajet.
«Biz ǵylym men óndiristi ushtastyrý týraly jii aitamyz. Biraq ondai bailanys áli de ornyqqan joq. Ashy bolsa da, muny moiyndaýymyz kerek. Otandyq óndiristi órkendetý úshin ǵylymi innovatsiialar, jańalyqtar qajet. Ǵalymdarymyzdyń eńbegi sapaly ónim shyǵarýǵa nemese óndiristi tiimdi etýge tiis. Sonda ǵana ekonomikamyz damidy.
Osy oraida, men taǵy bir mańyzdy bastama – Prezident janynan Ǵylym men tehnologiia máseleleri jóninde ulttyq keńes qurý jóninde sheshim qabyldadym. Oǵan eńbekteri jurtshylyqqa keń tanymal, ǵylymi ortada óte bedeldi ǵalymdarymyz múshe bolady. Bul qurylym ǵylym men tehnologiia salasyndaǵy saiasattyń basymdyqtaryn aiqyndaidy. Prezident Ákimshiligi, Ǵylym jáne joǵarǵy bilim ministrligi tiisti jumysty uiymdastyrýy qajet. Bul másele meniń jiti nazarymda» - dep túiindedi Toqaev.
