© Sputnik / Vasilii Golyshkin
Májilistegi "Aq jol" fraktsiiasynyń depýtattary qańtar oqiǵalary kezinde jazyqsyz tutqyndalǵan azamattardy bosatyp, tergeýdi ádil júrgizýdi talap etti, dep habarlaidy Sputnik Qazaqstan.
Májilis depýtaty, "Aq jol" fraktsiiasynyń múshesi Qazybek Isa bas prokýror men prezident janyndaǵy Adam quqyǵy jónindegi ýákilge qańtar oqiǵalaryna qatysty depýtattyq saýal joldady.
Depýtat qańtardaǵy qyrǵynda 227 adam qaza tapqanyn, 4500-den asa adam zardap shekkenin atap ótti. Ol qaza bolǵandardyń otbasyna kóńil aitty.
"Mundai qasietti qazaq tarihyna qara tańba salǵan qandy qasiret qaita qaitalanbaýy úshin memlekettik tóńkeristi jasamaq bolǵan kimder, basshysy kim, qosshysy kim, oryndaýshylary kimder, bári túgel anyqtalyp, tolyq jaýapqa tartylýǵa tiis!", - dedi Isa.
Aitýynsha, ereýil kezinde beibit sherýge shyqqany úshin kóp adam, ásirese, jastar jazyqsyz tutqyndalyp, soqqyǵa jyǵylyp, azaptalyp jatyr. Oǵan naqty málimetter men videolar dálel. Áleýmettik jelilerde de jii jazylyp júr.
"Tek qylmys jasaǵandar ǵana jaýapqa tartylýǵa tiis! Bundai jazyqsyz jandardy tutqyndap, azaptaý – naǵyz arandatý, memleketke, prezidenttiń saiasatyna qarsy qasaqana jasalyp jatqan qastandyq dep sanaimyz. Óitkeni, prezident Qasym-Jomart Toqaev árbir istiń ádil tergelýin, tipti aýyrlatatyn mán-jai bolmasa, jazalaryn jeńildetý kerek degen talap qoidy", - dedi depýtat.
Ol árkimniń áreketine ádil baǵa berý úshin, aldymen, lańkester men ekstremisterdi, sodyrlar men qaraqshy-tonaýshylardy bir bólek, al beibit sherýge shyqqandardy bir bólek qarastyrý kerek dep esepteidi.
"Túrli aqparattarǵa qarasaq, qazir sodyr jeitin soqqyny momyn da jep jatyr. "Aq jol" partiiasy túsip jatqan aryzdarǵa bailanysty osyndai talappen buǵan deiin de birneshe ret Bas prokýratýraǵa hat jazǵan bolatyn. Aryz-shaǵym kóbeigendikten, prezident janyndaǵy Adam quqyǵy jónindegi ýákildiktiń arnaiy toptaryna jergilikti máslihat depýtattaryn qosýdy usyndyq", - dedi májilismen.
Qazybek Isa "Aq jol" partiiasy tergeýdiń ádil ári ashyq ótýin talap etetinin málimdedi. Onyń pikirinshe, halyqtyq baqylaý ǵana zańsyzdyqtyń jolyn kesýge zor úles qosady.
Sondai-aq depýtattar tergeýdi zań jolymen ádil ótkizýdi, qamaýdaǵylardy azaptaýdy toqtatyp, jaralylardy aýrýhanaǵa jatqyzýdy talap etti.
Budan bólek, olar Adam quqyǵy jónindegi ýákildik janynan komissiialar quryp, parlament pen jergilikti máslihat depýtattaryn, saiasi partiialar men qoǵamdyq uiymdar ókilderin qosýdy usyndy.
