Bereke-birligimizdi saqtamasaq, jetistikterimizdiń bárinen airylyp qalýymyz múmkin. Bul týraly Prezident Qasym-Jomart Toqaev Qazaqstan halqyna Joldaýynda aitty, dep habarlaidy QazAqparat.
«Búgingi Joldaýdyń mán-mańyzy airyqsha. Onyń arqalaityn júgi bir jylmen shektelmeidi, aýqymy keń, mazmuny da bólek. Biz aldymyzǵa biik maqsattar qoiyp otyrmyz. Ózderińizben birge Jańa Qazaqstandy qurýǵa kiristik. Barshańyzǵa málim, byltyr egemendiktiń mańyzdy belesine jettik. Tarihi ólshemmen qaraǵanda 30 jyl tym kóp ýaqyt emes. Halqymyz Tuńǵysh Prezident Nursultan Nazarbaevtyń basshylyǵymen osy kezeńde aýqymdy jumys atqardy. Kóptegen tabystarǵa qol jetkizdi. Alaida, bereke-birligimizdi saqtamasaq, jetistikterimizdiń bárinen airylyp qalýymyz múmkin», - dedi Memleket basshysy.
QR Prezidenti qańtardaǵy dúrbeleń kezinde buǵan kózimiz anyq jetkenin basa aitty.
«Bul oqiǵalar búkil qoǵamdy dúr silkindirdi. Halqymyz buryn-sońdy bolmaǵan qaýip-qatermen betpe-bet keldi. Memleketimizdiń tutastyǵyna jáne egemendigimizge zor qaýip tóndi. Osy kúnderde jurtymyz Táýelsizdiktiń qadir-qasietin jan-júregimen sezindi. Tatýlyq pen turaqtylyq, tynyshtyq pen beibitshilik qanshalyqty mańyzdy ekenin jete túsindi. Biz myzǵymas birliktiń arqasynda memleketimizdi qorǵap qaldyq. Ýaqyty jáne batyl sheshim qabyldap, lańkesterge toitarys berdik. Men qashanda bárin ashyq aityp júrmin. Indet kezinde qalyptasqan ahýal jóninde jurtshylyqqa únemi aqparat berip otyrdym», - dedi Toqaev.
