Mysyrda joǵalyp ketken 6 qazaqstandyq stýdentti Kairdiń quqyq qorǵaý organdary ustap otyr. Bul jaiynda QR Syrtqy ister ministrligi baspasóz qyzmetiniń jetekshisi Ánýar Jainaqov Feisbýktegi paraqshasynda jazdy, dep habarlaidy "Ult aqparat".
"Bizdiń diplomattarymyzdan Mysyrda joǵalǵan qazaqstandyq stýdentterdi izdestirý nátijesi boiynsha aldyn ala aqparat tústi. Jańa ǵana senimdi kózderden alynǵan aqparat boiynsha atalǵan qazaqstandyq stýdentterdi Kair qalasynda quqyq qorǵaý organdarynyń qyzmetkerleri ustap alǵan jáne olar osy eldiń aýmaǵynda. Olardyń ómir men densaýlyǵyna tóngen qater joq", - dep jazdy ol.
Jainaqovtyń atap ótýinshe, qazirgi kezde Qazaqstannyń Mysyrdaǵy Elshiligi Mysyr tarabynan bizdiń azamattarymyzdyń ustalýy, qazirgi orny men jaǵdailary týraly resmi jaýap talap etýde.
«Taiaý arada Qazaqstan elshisi Mysyr Syrtqy ister ministriniń orynbasarymen osy máselege bailanysty kezdesý ótkizbek. Qosymsha aqparat Mysyr tarabymen kelissózder nátijesi boiynsha habarlanatyn bolady. Osy másele Qazaqstan Syrtqy ister ministrligi basshylyǵynyń erekshe jáne únemi baqylaýynda», - dedi Ánýar Jainaqov.
