Juma kúni Mysyr eliniń ońtústiginde eki jolaýshy poiyzynyń soqtyǵysýy saldarynan 32 adam qaza bolyp, kem degende 66 adam zardap shekti, dep habarlaidy TASS.
Qaiǵyly oqiǵa el astanasy Kair qalasynan ońtústikke qarai, Soqag provintsiiasynda bolǵan. Úsh vagon aýdarylǵan. Eldiń Densaýlyq saqtaý ministrliginiń málimetinshe, oqiǵa ornyna 36 jedel járdem kóligi jiberildi, olar zardap shekkenderdi jaqyn mańdaǵy aýrýhanalarǵa jetkizip jatyr.
Mysyrdyń Bas prokýratýrasy apatty tergeý amaldaryn bastady, al Kólik ministri Kámel ál-Ýazir – eki poiyzdyń mashinisterin qamaýǵa alýdy buiyrdy. Tergeýshilerden arnaiy komissiia qurylyp, onyń jumysyn eldiń premer-ministri Mustafa Madbýli jeke baqylaýyna aldy.
Apat saldarynan eldiń ońtústik baǵytqa qatynaityn poiyzdar qozǵalysy tolyq toqtatylǵan.
