Jobanyń ashylý saltanatyna Qazaqstannyń Mysyrdaǵy Elshisi Arman Isaǵaliev, Mysyrdyń Kóne eskertkishter ministri Haled ál-Anani, jobanyń bas merdigeri «Arab kontraktors» kompaniiasynyń Basqarma tóraǵasy Mýhsin Salah, Parlament depýtattary, memlekettik mekemeler basshylary, jýrnalister, tarihshy ǵalymdar, belsendiler jáne jergilikti halyq qatysty. Bul týraly QR SIM baspasóz qyzmeti habarlaidy.
Mysyrdyń Kóne eskertkishter ministri Haled ál-Anani Kairdegi ekinshi eń iri meshit bolyp sanalatyn babamyzdyń murasy - Kair úshin tarihi mańyzdy nysan ekenin atap ótti.
«Bul meshit - saiasi turǵydan Qazaqstan men Mysyr arasyndaǵy qarym-qatynastyń rámizi. Beibarystyń kindik tamǵan jeri sanalatyn Qazaqstan basshylyǵy men halqy jobanyń aiaqtalýyna úlken mán berip otyr. Atalǵan másele - Mysyr Prezidenti Abdýl-Fattah Halil ás-Sisidiń 2016 jyly Astanaǵa sapary barysynda qos memleket basshylary arasynda qol jetkizilgen ýaǵdalastyqtardyń biri», - dep málimdedi H. ál-Anani.
Buǵan deiin jobanyń arhelogiialyq jáne sáýlettik zertteýleri, sondai-aq irgetas jáne jerasty jumystary bitkenin málimdegen mysyrlyq ministr meshittiń shańyraqty bólmelerin, dálizin, kúmbezin, munaralaryn, ortalyq alańyn jáne syrtqy qabyrǵalaryn jóndeý jumystary iske asyrylatynyn habarlady. Jobaǵa tehnikalyq baqylaýdy mysyrlyq arheologtar men tarihi sáýletshilerden qurylǵan arnaiy komissiia júrgizedi. Atalǵan komissiia meshittiń ishki baǵanalaryna buǵan deiin paidalanylǵan qyzyl kirpishterdi jaramsyz dep taýyp, óz túpnusqasyna uqsas joǵary sapaly granittik qyshty paidalanýdy jón dep tapty.
Arman Isaǵaliev Qazaqstan men Mysyr arasyndaǵy tarihi bailanystardyń rámizine ainalǵan qazaq dalasynyń perzenti Sultan Beibarystyń murasyn jańǵyrtý jumystarynyń qaita bastalǵanyn rizashylyqpen atap ótip, Mysyrdyń Memleket jáne Úkimet basshylyǵyna alǵysyn bildirdi.
«Ortaq muramyzdy saqtaýǵa degen Mysyr basshylyǵynyń qamqorlyǵyn joǵary baǵalaimyz. Mysyrdy musylman áleminiń ortalyǵy, Kairdi Abbasid halifatynyń astanasy etip kótergen kemeńger tulǵanyń eskertkishi qaita qalpyna keltirilip, Mysyrdyń musylman álemindegi erekshe róline, Taiaý Shyǵystaǵy bedeli men abyroiyna taǵy da bir rámiz bolady degen senimdemin», - dedi qazaqstandyq diplomat.
Quny 12 mln AQSh dollaryn quraityn meshitti restavratsiialaý jobasyna Qazaqstan tarapynan 4,5 mln AQSh dollary bólingen. Al Mysyr tarapy 100 mln mysyrlyq fýnt aýdarǵan.
Qalpyna keltirý jumystary 18 ai ishinde bitedi dep kútilýde.
